(វ៉ាស៊ីនតោន)៖​ ប្រធានាធិបតីអាមេរិក លោក ដូណាល់ ត្រាំ បាននិយាយថាលោកបានប្រើពេលតែបីខែប៉ុណ្ណោះ អាចឱ្យ កូរ៉េខាងជើងបញ្ឈប់ការធ្វើតេស្ដអាវុធនុយក្លេអ៊ែរ និងមីស៊ីល ផ្ទុយពីរដ្ឋាភិបាលអាមេរិកមុនៗដែលចំណាយពេល៣០ឆ្នាំ ហើយមិនបានផលអ្វីទាល់តែសោះ។​ នេះបើតាមការចេញផ្សាយដោយសារព័ត៌មាន CGTN នៅថ្ងៃអង្គារ ទី២១ ខែសីហា ឆ្នាំ២០១៨។

ការលើកឡើងខាងលើរបស់លោក ដូណាល់ ត្រាំ ធ្វើឡើងនៅក្នុងបទសម្ភាសន៍ជាមួយទីភ្នាក់ងារសារព័ត៌មាន Reuters​ នៅថ្ងៃចន្ទ សប្ដាហ៍នេះ (ម៉ោងនៅអាមេរិក)។ ថ្លែងនាឱកាសនោះ លោក ដូណាល់ ត្រាំ បានកត់សម្គាល់ដូច្នេះថា៖ «ខ្ញុំបញ្ឈប់កូរ៉េខាងជើងពីការ ធ្វើតេស្ដអាវុធនុយក្លេអ៊ែរ និងមីស៊ីល ដោយធ្វើការងារជាមួយទីក្រុងព្យុងយ៉ាងត្រឹមតែបីខែប៉ុណ្ណោះ ផ្ទុយពីរដ្ឋាភិបាលអាមេរិកមុនៗ ដែលចំណាយពេលជាង៣០ឆ្នាំ តែមិនបានទទួលផលអ្វីទាល់តែសោះ»។ លើសពីនេះទៅទៀត លោក ត្រាំ បានបន្ថែមថាលោក ទំនាក់ទំនងផ្ទាល់ខ្លួនល្អជាមួយលោក គីម ជុងអ៊ុន។ «គាត់ចូលចិត្តខ្ញុំ ហើយខ្ញុំចូលចិត្តគាត់...ហើយឥលូវស្ថានភាពពិតជាស្ងប់ស្ងាត់ ព្រោះមិនមានការធ្វើតេស្ដមីស៊ីល ឬនុយក្លេអ៊ែរ»។ នេះបើតាមលោក ដូណាល់ ត្រាំ។

គួរបញ្ជាក់ថា ឆ្លើយតបនឹងសំណួរបស់ Reuters ជុំវិញជំនួបជាលើកទីពីរជាមួយលោក គីម ជុងអ៊ុន លោក ដូណាល់ ត្រាំ បាននិយាយថាជំនួបនេះ អាចនឹងកើតឡើងទៅរួចនៅពេលវេលាសាកសមណាមួយ បន្ទាប់ពីលោក បានជួបជាមួយលោក គីម ក្នុង ប្រទេសសិង្ហបុរី កាលពីថ្ងៃទី១២ ខែមិថុនា កន្លងទៅ៕