(ញូដេលី)៖ មកទល់ពេលនេះចំនួនមនុស្ស​បានកើនដល់ច្រើនជាង៤១០នាក់ ខណៈមនុស្ស​ជាងមួយលាននាក់ហើយ បាន​ជ្រក​កោណ​នៅ​តាមជំរុំស្នាក់នៅបណ្តោះអាសន្ន ដើម្បី​​គេច​ពីមហន្តរាយ​គ្រោះជំនន់ដ៏អាក្រក់ នៅខេត្ត Kerala ភាគខាងត្បូង​ប្រទេសឥណ្ឌា។ នេះ​បើ​តាមការដកស្រង់ការផ្សាយចេញពីសារព័ត៌មាន Channel News Asia នៅល្ងាចថ្ងៃ​អង្គារ ទី២១ ខែសីហា ឆ្នាំ២០១៨។

បើតាមអាជ្ញាធរឥណ្ឌា លំនៅឋានប្រហែល៥០,០០០ខ្នង ​នៅរដ្ឋ Kerala ត្រូវបានបំផ្លិចបំផ្លាញ ដោយសារតែគ្រោះទឹកជំនន់ ហើយ​ប្រជាជនកំពុងសម្រុកទៅជ្រកកោណ នៅតាមជំរុំបណ្តោះអាសន្ន​ប្រមាណ៣,២០០កន្លែង ខណ​កងទ័ពឥណ្ឌា​រាប់​ពាន់​នាក់កំពុងបន្ត​ប្រតិបត្តិ​ការនៅទូទាំង​រដ្ឋ​​ ដើម្បីជួយសង្រ្គោះ​អ្នកដែលនៅជាប់តាមតំបន់ភ្នំ និងតំបន់ដាច់ស្រយាល។

គួរជម្រាបថា ដើម្បីឆ្លើយតបនឹងបញ្ហាគ្រោះធម្មជាតិនេះ នាយករដ្ឋមន្រ្តីឥណ្ឌា លោក Narendra Modi ក៏បានប្រកាសទម្លាក់​កញ្ចប់​ថវិកា​ជំនួយ​​ប្រមាណ៧៥លានដុល្លារភ្លាមៗ បន្ថែមពីលើថវិការបស់រដ្ឋាភិបាល​កណ្តាល​ចំនួន១៥លានដុល្លារ​ ដើម្បីជួយដល់រដ្ឋ Kerala ផង​ដែរ​៕