(បាងកក)៖ តុលាការនៅប្រទេសថៃបានចេញដីកាចាប់ខ្លួនម្ចាស់វែបសាយ និងអ្នកប្រើប្រាស់អ៊ីនធើណែតជាច្រើននាក់ ដែលបានចែកចាយបន្តនូវព័ត៌មានប្រឌិត អំពីនារីជនជាតិអង់គ្លេសម្នាក់ ដែលត្រូវបានគេរំលោភនៅលើកោះទេសចរណ៍មួយកន្លែង ក្នុងប្រទេសអាស៊ានមួយនេះ។ នេះបើតាមការដកស្រង់ការផ្សាយចេញពី ទីភ្នាក់ងារព័ត៌មានចិន ស៊ីនហួរ នៅល្ងាចថ្ងៃអង្គារ ទី០៤ ខែកញ្ញា ឆ្នាំ២០១៨។
ប៉ូលិសថៃទើបទទួលបានដីកាចាប់ខ្លួនខាងលើ ពីតុលាការខេត្ត ស៊ូរ៉ាត់ ថានី (Surat Thani) ក្រោយការកើតមានបទល្មើសខាងលើ ដែលត្រូវគេរាយការណ៍ថា បានប្រព្រឹត្តទៅកាលពីខែមិថុនា នៅកោះតៅភាគខាងត្បូងប្រទេសថៃ ហើយដីកាចាប់ខ្លួននេះ គឺសម្រាប់ម្ចាស់វែបសាយ CSI LA ដែលមានឈ្មោះថា ក្រាក់មុខ អាណាន់តាស៊ីល (Prakmuk Anantasilp) រួមជាមួយបុគ្គលជាច្រើននាក់ទៀត ដែលបានព្យាយាមចែកចាយបន្ត នូវព័ត៌មានប្រឌិតនេះតាមអនឡាញ។
គួរជម្រាបថា វែបសាយ CSI LA បានចុះផ្សាយអំពីរឿងក្តីរំលោភផ្លូវភេទទៅលើ នារីជនជាតិអង់គ្លេសវ័យ ១៩ឆ្នាំម្នាក់ មានឈ្មោះថា អ៊ីសាបែលឡេ (Isabelle) ដោយប៉ូលិសថៃបានរកឃើញថា តាមពិតជារឿងព័ត៌មានប្រឌិត ទើបឈានដល់ឲ្យមានការចេញដីកាចាប់ខ្លួនម្ចាស់វែបសាយ ព្រមទាំងអ្នកចែកចាយបន្តតែម្តង។
អាជ្ញាធរថៃបានលើកឡើងថា ការក៏បង្កើតក៏ដូចជាផ្សព្វផ្សាយរឿងប្រឌិតបែបនេះ បានធ្វើឲ្យខូចមុខមាត់នៃវិស័យទេសចរណ៍ថៃ និងប៉ះពាល់ដល់សន្តិសុខជាតិ សុវត្ថិភាពសាធារណៈ និងស្ថិរភាពសេដ្ឋកិច្ចរបស់ប្រទេសថៃជាខ្លាំង៕
