(អាមេរិក)៖ សភាវិនិច្ឆ័យនៃទីក្រុង Philadelphia, រដ្ឋ Pennsylvania សហរដ្ឋអាមេរិក បានផ្ញើសារលិខិតអបអរសាទរជូនចំពោះសម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា និងជាប្រធានគណបក្សប្រជាជនកម្ពុជា ដែលទទួលបានជ័យជំនះក្នុងការបោះឆ្នោតអាណត្តិទី៦ និងប្រកាសស្វាគមន៍ដល់ដំណើររបស់សម្តេចមកកាន់ទឹកដីអាមេរិក។
លិខិតរបស់លោក JAMES M DeLEON ចៅក្រមនៃសភាវិនិច្ឆ័យនៃទីក្រុង Philadelphia, ចុះថ្ងៃទី២៤ ខែកញ្ញា ឆ្នាំ២០១៨ បានសរសេររៀបរាប់យ៉ាងដូច្នេះថា៖ «ស្វាគមន៍ដំណើរ មកដល់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា, ខ្ញុំសូមអបអរសាទរដល់ការជាប់ឆ្នោតជានាយករដ្ឋមន្ត្រី នៃព្រះរាជាណាចក្រកម្ពុជាសាជាថ្មីរបស់សម្តេច នៅក្នុងការបោះឆ្នោតជ្រើសរើសតំណាងរាស្ត្រកាលពីថ្ងៃទី២៩ ខែកក្កដា ឆ្នាំ២០១៨។ ការខិតខំប្រឹងប្រែងរបស់សម្តេចនៅក្នុងយុទ្ធនាការឃោសនា បោះឆ្នោត គឺជាលទ្ធផលបានមកពីការសម្រេចចិត្តដោយផ្ទាល់ដៃរបស់ប្រជាជនកម្ពុជា និងផ្ដល់ជូនសម្តេចនូវភាពជាអ្នកដឹកនាំក្នុងការរំដោះ ប្រទេសកម្ពុជាចេញពីរបបប្រល័យពូជសាសន៍ប៉ុលពត»។
ខាងក្រោមខ្លឹមសារនៃលិខិត (បកប្រែក្រៅផ្លូវការ)
ចៅក្រមនៃសភាវិនិច្ឆ័យនៃទីក្រុង Philadelphia, រដ្ឋ Pennsylvania, ថ្ងៃទី២៤ ខែកញ្ញា ឆ្នាំ២០១៨
ស្វាគមន៍ដំណើរមកដល់របស់សម្ដេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា
សម្តេចនាយករដ្ឋមន្ត្រីជាទីគោរព៖
ខ្ញុំសូមអបអរសាទរដល់ការជាប់ឆ្នោតជានាយករដ្ឋមន្ត្រី នៃព្រះរាជាណាចក្រកម្ពុជាសាជាថ្មីរបស់សម្តេច នៅក្នុងការបោះឆ្នោតជ្រើសរើសតំណាងរាស្ត្រកាលពីថ្ងៃទី២៩ ខែកក្កដា ឆ្នាំ២០១៨។ ការខិតខំប្រឹងប្រែងរបស់សម្តេចនៅក្នុងយុទ្ធនាការឃោសនា បោះឆ្នោត គឺជាលទ្ធផលបានមកពីការសម្រេចចិត្តដោយផ្ទាល់ដៃរបស់ប្រជាជនកម្ពុជា និងផ្ដល់ជូនសម្តេចនូវភាពជាអ្នកដឹកនាំក្នុងការរំដោះ ប្រទេសកម្ពុជាចេញពីរបបប្រល័យពូជសាសន៍ប៉ុលពត។
បន្ថែមពីលើនេះ សម្តេចបានផ្ដល់ភាពជាមេដឹកនាំដល់សហគមន៍ខ្មែរ-អាមេរិកកាំង ព្រមទាំងកិច្ចខិតខំប្រឹងប្រែងរបស់សម្តេចក្នុង ការលើកកម្ពស់យុត្តិធម៌សង្គម សេ្ថរភាពសេដ្ឋកិច្ច សេចក្ដីថ្លៃថ្នូររបស់មនុស្ស ឯកភាពក្នុងនាមជាគ្រួសារតែមួយ កិច្ចសម្របសម្រួល នៃអង្គការមនុស្សធម៌ បុគ្គល និងគ្រួសារ ដើម្បីបង្កើតអនាគតរុងរឿងបន្ថែមទៀត ដល់ប្រជាជនខ្មែរ-អាមេរិកទាំងអស់។
ក្នុងនាមជាចៅក្រម នៃតុលាការទីក្រុង Philadelphia ជាតុលាការដ៏ចំណាស់មួយក្នុងរដ្ឋ Pennsylvania ដែលបានធ្វើប្រតិបត្តិការចាប់តាំងពីឆ្នាំ១៦៨២ មក ខ្ញុំសូមស្វាមគមន៍ដំណើរមកកាន់សហរដ្ឋអាមេរិករបស់សម្តេច។
ពីខ្ញុំ, ចៅក្រម JAMES M DeLEON
