(ភ្នំពេញ)៖ ប្រធានរតនាគាររាជធានីភ្នំពេញថ្មី ត្រូវបានប្រកាសតែងតាំង និងឲ្យចូលកាន់តំណែង នៅរសៀលថ្ងៃទី១៥ ខែមីនា ឆ្នាំ២០១៩ ក្រោមវត្តមាន លោក ឆាន់ វឌ្ឍនៈ អនុរដ្ឋលេខាធិការ ក្រសួងសេដ្ឋកិច្ច និងហិរញ្ញវត្ថុ ដោយមានការចូលរួមពីលោក ម៉ម សារិន ប្រធានក្រុមប្រឹក្សារាជធានីភ្នំពេញ, លោក ឃួង ស្រេង អភិបាលរាជធានីភ្នំពេញ និងមានការចូលរួមពីថ្នាក់ដឹកនាំ ប្រធានអង្គភាព និងមន្រ្តីពាក់ព័ន្ធជាច្រើននាក់ទៀត។
លោក ស៊ាង ដារ៉ា ត្រូវបានតែងតាំងជាប្រធានរតនាគារាជធានីភ្នំពេញ ជំនួសលោក កែ ប៊ុនឡេង ដែលត្រូវចូលនិវត្តន៍។ លោក ឃួង ស្រេង បានចាត់ទុកថា ការប្រកាសតែងតាំងមន្រ្តីរាជការ ធ្វើឡើងជាធម្មតា ក្នុងដំណើរការមុខងារសាធារណៈរបស់មន្រ្តីរាជការ ស៊ីវិល ដែលតែងតែមានការតែងតាំង ការផ្ទេរភារកិច្ច សម្រួលភារកិច្ច និងចូលនិវត្តន៍ ទៅតាមនីតិវិធីដែលបានកំណត់ ដោយច្បាប់។
ដើម្បីបន្តនិរន្តរភាពរដ្ឋបាល និងបន្តអនុវត្តន៍ស្នាដៃការងារឲ្យមានប្រសិទ្ធភាព តម្លាភាព និងគណនេយ្យភាព លោក ឃួង ស្រេង បានស្នើឲ្យថ្នាក់ដឹកនាំ និងប្រធានអង្គភាព ចំណុះរដ្ឋបាលរាជធានីភ្នំពេញទាំងអស់ ត្រូវប្រតិបត្តិខ្លួនជាមេដឹកនាំ បំរើរាស្រ្តដោយស្មោះត្រង់ ហើយត្រូវអនុវត្តឱ្យស្របតាមបាវចនាទាំង០២ និងអភិក្រមទាំង០៥ របស់សម្តេតេជោនាយករដ្ឋមន្រ្តី គឺកែទម្រង់ខាងក្នុង ពង្រីកមិត្តខាងក្រៅ និងឆ្លុះកញ្ចក់ ងូតទឹក ដុះក្អែល ព្យាបាល និងវះកាត់។
លោកអភិបាលបានបញ្ជាក់ថា ការគ្រប់គ្រងហិរញ្ញវត្ថុសាធារណៈ គឺជាផ្នែកមួយដ៏សំខាន់ នៃការអនុវត្តកម្មវិធីកំណែទម្រង់ចំនួន៤របស់រាជរដ្ឋាភិបាល ក្នុងនោះមាន ការប្រយុទ្ធប្រឆាំងអំពើរពុករលួយ កំណែទម្រង់ច្បាប់ និងប្រព័ន្ធយុត្តិធម៌ កំណែទម្រង់រដ្ឋបាលសាធារណៈ និងកំណែទម្រង់កងកម្លាំងប្រដាប់អាវុធ ដើម្បីប្រើប្រាស់ឱ្យអស់សក្កានុពល និងកាលានុវត្តភាពទាំងឡាយដែលមាន ទាំងនៅថ្នាក់ជាតិ និងថ្នាក់ក្រោមជាតិមានភាពច្បាស់លាស់ចំទិសដៅទាន់សភាពការណ៍ ឆ្លើយតបទៅនឹងតម្រូវការជាក់ស្តែងរបស់ប្រជាពលរដ្ឋ និងដំណើរវិវឌ្ឍន៍នៃសង្គម សេដ្ឋកិច្ច និងនយោបាយ។
លោកអភិបាលបញ្ជាក់ថា ថ្វីត្បិតតែរតនាគាររាជធានីភ្នំពេញ គឺជាអង្គភាពមូលដ្ឋាន ចំណុះឱ្យអគ្គនាយកដ្ឋានរតនាគារជាតិ នៃក្រសួងសេដ្ឋកិច្ច និងហិរញ្ញវត្ថុ ប៉ុន្តែជាកត្តាសត្យានុម័ត អង្គភាពនេះ ក៏ត្រូវមានគណនេយ្យភាព ចំពោះមុខរដ្ឋបាលរាជធានីភ្នំពេញ ជុំវិញការអនុវត្តលិខិតបទដ្ឋានគតិយុត្តិជាធរមាន ក្នុងតួនាទី និងភារកិច្ចស្នូល ចំនួន៤ ក្នុងក្របខណ្ឌរាជធានីភ្នំពេញផងដែរ។
ដូច្នេះប្រធានរតនាគាររាជធានីថ្មី ត្រូវតែបន្តពង្រឹងអភិបាលកិច្ច ក្នុងការគ្រប់គ្រងហិរញ្ញវត្ថុសាធារណៈ ក៏ដូចជាបន្តយកចិត្តទុកដាក់អនុវត្តការងារឱ្យបានល្អ បង្កើនសាមគ្គីភាព មិត្តភាព រក្សាឯកភាពផ្ទៃក្នុង និងបន្តកិច្ចសហប្រតិបត្តការជាមួយស្ថាប័ន្ធពាក់ព័ន្ធជុំវិញឱ្យបានកាន់តែល្អថែមទៀត។
ជាមួយគ្នានេះ លោក ស៊ាង ដារ៉ា ប្រធានរតនាគាររាជធានីភ្នំពេញថ្មី បានប្តេជ្ញាអនុវត្តឱ្យបានល្អ តាមគោលនយោបាយ របស់រាជរដ្ឋាភិបាល ពិសេសអនុវត្តតាមអនុសាសន៍ដ៏ថ្លៃថ្លារបស់ ប្រមុខរាជរដ្ឋាភិបាល ក៏ដូចជាបទបញ្ជារបស់ក្រសួងសាម៉ី និងផែនការសកម្មភាពរបស់រដ្ឋបាលរាជធានីភ្នំពេញ សំដៅបំរើដល់ផលប្រយោជន៍ប្រជាពលរដ្ឋក្នុងរាជធានី និងសង្គមជាតិទាំងមូល៕
