(កំពង់ស្ពឺ)៖ ក្នុងពិធីបើកការដ្ឋានសាងសង់ផ្លូវល្បឿនលឿនពីភ្នំពេញ ខេត្តព្រះសីហនុ ដោយចំណាយថវិកា២ពាន់លានដុល្លារ ដែលជាកម្ចីពីប្រទេសចិន នៅព្រឹកថ្ងៃទី២២ ខែមីនា ឆ្នាំ២០១៩នេះ សម្ដេចតេជោ ហ៊ុន សែន នាយករដ្ឋមន្ដ្រីនៃកម្ពុជា បានប្រកាសថា កម្ពុជាស្វាគមន៍គ្រប់ការវិនិយោគទាំងអស់ មិនបិទទ្វារប្រទេសណាមួយនោះទេ។
សម្ដេចតេជោនាយករដ្ឋមន្ដ្រី ក៏បានគូសបញ្ជាក់ ដោយឆ្លើយតបការលើកឡើងថា កម្ពុជាលំអៀងទៅចិននោះ សម្តេច ថា កម្ពុជាមិនដែលទាត់ចោលការវិនិយោគ របស់បរទេសណាមួយនោះទេ ផ្ទុយទៅប្រទេសដែលលើកឡើងថា ក ម្ពុជាលំអៀងទៅចិននោះ មិនដែលបានដាក់គម្រោងវិនិយោគនៅកម្ពុជានោះទេ ហើយប្រទេសមួយនេះ ត្រូវ ការមិត្តភក្តិដែលស្មើភាព ស្មើសិទ្ធិតែប៉ុណ្ណោះ។
ប្រមុខនៃរាជរដ្ឋាភិបាលកម្ពុជា បានមានប្រសាសន៍យ៉ាងដូច្នេះថា «ខ្ញុំមិនបដិសេធចោលជាមួយដៃគូបរទេសណាទាំងអស់ សូមអញ្ជើញមកវិនិយោគ សូមអញ្ជើញឲ្យកម្ពុជាផ្ដល់ប្រាក់កម្ចីបន្ដទៅទៀត ព្រោះយើងត្រូវការដៃគូទាំងអស់ [...] ស្អីឡើងក្រុមហ៊ុនចិន ចុះបើចិនមកសុំវិនិយោគឲ្យយើង បដិសេធធ្វើមិច យើងមិនដែលទាត់ចោលក្រុមហ៊ុនណាមួយទេ យើងស្វាគមន៍ទាំងអស់»។
សម្ដេចតេជោ ហ៊ុន សែន បានឲ្យដឹងដែរថា បច្ចុប្បន្ននៅប្រទេសកម្ពុជា មានក្រុមហ៊ុនមកពីបណ្ដាប្រទេសច្រើនផ្សេងៗ ដែលកំពុងតែមករកស៊ីវិនិយោគ រួមមាន ចិន វៀតណាម ថៃ ម៉ាឡេស៊ី កូរ៉េខាងត្បូង ជប៉ុន អាមេរិក អឺរ៉ុប និងប្រទេសមួយចំនួនទៀត។
សម្ដេចនាយករដ្ឋមន្ដ្រី បានអះអាងថា ប្រទេសចិនតែម្នាក់ឯង ក៏មិនអាចវិនិយោគនៅកម្ពុជាគ្រប់នោះទេ ពោលកម្ពុជាត្រូវការការវិនិយោគគ្រប់ទីកន្លែង ឲ្យមកវិនិយោគ ហើយកន្លងទៅធនាគារអឺរ៉ុប ធនាគារអភិវឌ្ឍន៍អាស៊ី ធនាគារពិភពលោក ក៏ធ្លាប់ផ្ដល់ប្រាក់កម្ចីឲ្យកម្ពុជាដែរ ដែលកម្ពុជាក៏ទទួលយកដូចគ្នា ព្រោះកម្ពុជាស្វាគមន៍ជានិច្ចគ្រប់ទិសទី។
ប្រមុខនៃរាជរដ្ឋាភិបាលកម្ពុជា ក៏បានប្រកាសបន្ថែមថា ប្រទេសមួយចំនួនកុំបានតែនិយាយ រួចដាក់ កម្ពុជា ក្នុងភូមិសាស្ដ្រនយោបាយ គឺគ្មានផ្លូវជាដាច់ខាត ព្រោះកម្ពុជាត្រូវការមិត្តភ័ក្រស្មើភាព និងស្មើសិទ្ធិតែប៉ុណ្ណោះ។ កម្ពុជាត្រូវការអភិវឌ្ឍដោយមានមិត្តភ័ក្រចូលរួម នៅក្នុងការជួយ តាមរយៈជំនួយឥតសំណងក្ដី តាមរយៈហិរញ្ញប្បទានសម្បទានក្ដី និង តាមរយៈការរុញអ្នកវិនិយោគឲ្យមករកស៊ីនៅកម្ពុជាជាដើម៕
