(ភ្នំពេញ)៖ សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានបង្ហាញនូវទស្សនទានថា នៅលើពិភពលោកនេះ ប្រទេសទាំងអស់មិនមានស្តង់ដារដូចគ្នាទេ ព្រោះពិភពលោកមានស្តង់ដារច្រើនខុសប្លែកពីគ្នា ហើយបរិបទនៅកម្ពុជា ក៏មិនដូចប្រទេសដទៃដែរ។
ការលើកឡើងរបស់សម្តេចតេជោ ហ៊ុន សែន បានធ្វើឡើងនៅថ្ងៃទី២៦ ខែមីនា ឆ្នាំ២០១៩នេះ ក្នុងឱកាសសម្តេច អញ្ជើញជាអធិបតីបើកសន្និសីទចក្ខុវិស័យប្រទេសកម្ពុជាលើកទី១៣ ឆ្នាំ២០១៩ នៅសណ្ឋាគារ ហ្គ្រេតឌ្យូកភ្នំពេញ (អតីតសណ្ឋាគារ អាំងទែកុងទីណង់តាល់) រាជធានីភ្នំពេញ។
សម្តេចតេជោ ហ៊ុន សែន បានថ្លែងថា៖ «ខ្ញុំមិនមែនបញ្ជូនសារទៅនរណាទេ ប៉ុន្តែកង្វល់របស់អ្នកដទៃ មិនមែនជាបន្ទាត់ ឬច្បាប់ដែលកម្ពុជា ត្រូវអនុវត្តទេ កម្ពុជាត្រូវមានច្បាប់របស់ខ្លួនមួយដោយឡែក ប្រទេសដទៃសុទ្ធតែមានស្ថានភាពខុសៗគ្នា អ្នកទទួលស្គាល់ថា ប្រទេសដទៃមានស្ថានភាពខុសគ្នា ម៉េចក៏មិនទទួលស្គាល់ថាកម្ពុជាមានស្ថានភាពខុសគេដែរ»។
សម្តេចតេជោ ហ៊ុន សែន បានចោទជាសំណួរថា នៅលើពិភពលោកនេះ ក្នុងសតវត្សរ៍ទី២០នេះ តើមានរបបប៉ុល ពត កើតឡើងដូចគ្នាឬទេ? សម្តេចបញ្ជាក់ថា «អ្នកចេះទទួលស្គាល់ថា ប្រទេសមួយមានបរិបទមួយ ប៉ុន្តែមិនព្រមទទួលស្គាល់ថា កម្ពុជាមានបរិបទរបស់កម្ពុជាមួយដែរទេ»។
សម្តេចបានបន្តទៀតថា «ពិភពលោកមានស្តង់ដារច្រើនពេកហើយ ប៉ុន្តែត្រូវតែគោរពដល់យុត្តិធម៌ គោរពទៅដល់អ្វីដែលជាគោលការ គឺប្រទេសនេះមានគោលការណ៍បែបនេះ ប្រទេសនោះមានគោលការណ៍បែបនោះ ដូច្នេះវាអត់មានស្តង់ដារមួយឯកភាព នេះហើយជាកន្លែងដែលយើងពិបាក»។
សម្តេចបានបញ្ជាក់ទៀតថា៖ «ប្រទេសមួយចាប់បង្ខំឱ្យប្រទេសមួយធ្វើតាមខ្លួន តើគេធ្វើបានឬអត់? អ្នកឯងស៊ីនំប៉័ងខ្ញុំស៊ីបាយ ធ្វើម្តេចដូចគ្នា រឿងតែអញ្ចឹង គេធ្វើបានយើងធ្វើមិនបានអាហ្នឹងយ៉ាងម៉េច សង្ឃឹមថាយើងអាចយល់គ្នាដើម្បីរួមដំណើរជាមួយ ពិសេសយកអង្គឯកភាព នៃការអភិវឌ្ឍវិទ្យាសាស្រ្តបច្ចេកទេសនេះ ដើម្បីចេញដំណើរទៅរួមគ្នា យើងអាចបំព្រួញការខុសគ្នា»៕
