(វៀតណាម)៖ នាឱកាសចូលរួមក្នុងកិច្ចប្រជុំលើកទី៦ ស្តីពីកិច្ចសហប្រតិបត្តិករទេសចរណ៍ភាគខាងត្បូង នៅក្រុងកាន់ធើ ប្រទេសវៀតណាម នាថ្ងៃទី១៤ ខែសីហា ឆ្នាំ២០១៩ ក្រុមការងារទេសចរណ៍កម្ពុជា មីយ៉ាន់ម៉ា ថៃ និងវៀតណាម បានជំរុញឲ្យផ្នែកឯកជនបង្កើនកញ្ចប់ទស្សនកិច្ចឆ្លងកាត់ប្រទេសទាំងបួន ពិសេសត្រូវបង្កើនកញ្ចប់ទស្សនកិច្ចតាមផ្លូវសមុទ្រឱ្យបានច្រើន តាមរយៈការតភ្ជាប់នាវាទេសចរណ៍តំបន់សមុទ្រ។

កិច្ចប្រជុំនេះរៀបចំឡើងដើម្បីផ្សព្វផ្សាយផលិតផល និងសេវាកម្មទេសចរណ៍នៅតាមច្រករបៀងទេសចរណ៍ និងពិនិត្យការជំរុញឲ្យផ្នែកឯកជនរៀបចំកញ្ចប់ទស្សនកិច្ចនៃប្រទេសទាំងបួន ក្នុងការរៀបចំកញ្ចប់ទស្សនកិច្ចឲ្យកាន់តែមានសុក្រឹត្យភាព និងប្រសិទ្ធភាពខ្ពស់ រួមចំណែកការអភិវឌ្ឍវិស័យទេសចរណ៍ប្រកបដោយចីរភាព និងការទទួលខុសត្រូវ ជាពិសេសជំរុញកិច្ចអភិវឌ្ឍន៍សេដ្ឋកិច្ច-សង្គម ការថែរក្សា ការការពារ និងការអភិរក្សសម្បត្តិវប្បធម៌ ប្រវត្តិសាស្រ្ត និងធនធានធម្មជាតិ បង្កើតឱកាសការងារ ប្រាក់ចំណូល ការកាត់បន្ថយភាពក្រីក្ររបស់ប្រជាពលរដ្ឋ លើកស្ទួយកិត្យានុភាពជាតិលើឆាកអន្តរជាតិ ការពង្រឹង និងពង្រីកមិត្តភាព សាមគ្គីភាព និងកិច្ចសហប្រតិបត្តិការទេសចរណ៍ក្នុងតំបន់។

អង្គប្រជុំបានពិភាក្សាលើចំណុចមួយចំនួន ដូចខាងក្រោម៖
១៖ ការអភិវឌ្ឍផលិតផល និងវិនិយោគលើវិស័យទេសចរណ៍
២៖ ការសិក្សាទីផ្សារ និងផ្សព្វផ្សាយទេសចរណ៍រួមគ្នា
៣៖ ការអភិវឌ្ឍធនធានមនុស្ស
៤៖ ការសម្រួលការធ្វើដំណើរដល់ភ្ញៀវទេសចរ
៥៖ ការតភ្ជាប់នាវាទេសចរណ៍តំបន់សមុទ្រ និងទន្លេមេគង្គ
៦៖ ការជំរុញឲ្យប្រទេសមីយ៉ាន់ម៉ា តភ្ជាប់នាវាទេសចរណ៍សមុទ្រក្នុងតំបន់ភាគខាងត្បូង
៧៖ ការតភា្ជប់ទេសចរណ៍បេតិកភណ្ឌភាគខាងត្បូង
៨៖ ការជំរុញរៀបចំខ្សែទស្សនកិច្ចបែប Caravan Tour និងទេសចរបើកបរដោយខ្លួនឯង Self-Driving Tour
៩៖ ការតភ្ជាប់ការហោះហើរត្រង់នៅតំបន់ភាគខាងត្បូង។

ការអភិវឌ្ឍទេសចរណ៍ភាគខាងត្បូង កម្ពុជា មីយ៉ាន់ម៉ា ថៃ វៀតណាមនេះ នឹងក្លាយជាចលករដ៏មានឥទ្ធិពលជំរុញកំណើនសេដ្ឋកិច្ច ការអភិវឌ្ឍសង្គម ការលើកកម្ពស់ផលិតភាព និងគុណភាពទេសចរណ៍ ស្របតាមនិន្នាការថ្មីនៃសេដ្ឋកិច្ចតំបន់ និងពិភពលោក ការបើកទីផ្សារទេសចរណ៍ថ្មី ការទាក់ទាញការវិនិយោគ។

ក្នុងន័យនេះ វិស័យទេសចរណ៍កម្ពុជា ជាពិសេសទេសចរណ៍ភាគខាងត្បូងកម្ពុជា នឹងកាន់តែរីកចម្រើនប្រកបដោយគុណភាព មានផលសេដ្ឋកិច្ចខ្ពស់ និងទទួលបានផលប្រយោជន៍ពីកាលានុវត្តភាពនៃសកលភាវូបនីយកម្ម និងការធ្វើសមាហរណកម្មកម្ពុជាទៅក្នុងតំបន់ និងអន្តរជាតិ។

ស្របតាមកាលានុវត្តភាពថ្មីៗនៃតំបន់ និងអន្តរជាតិ សភាពការណ៍រីកចម្រើននៃវិស័យទេសចរណ៍ ព្រមទាំងសក្តានុពល និងឧត្តមភាពប្រៀបធៀបរបស់កម្ពុជា គឺជាកត្តាយុទ្ធសាស្ត្រដ៏សំខាន់មួយក្នុងការជំរុញកិច្ចអភិវឌ្ឍក្នុងក្របខណ្ឌសេដ្ឋកិច្ច-សង្គមទាំងមូល តាមរយៈវិស័យទេសចរណ៍ ដោយបង្កើតឡើងនូវផលិតផលទេសចរណ៍ថ្មី ហើយផ្តល់ឱកាសឲ្យទេសចរ និងអ្នកវិនិយោគមានសិទ្ធិចូល-ចេញច្រើនដង ការទស្សនា ការស្នាក់នៅ និងការចូលរួមការវិនិយោគលើវិស័យទេសចរណ៍នៅកម្ពុជា។

ក្រុមការងារខាងភាគីកម្ពុជា ត្រូវបានដឹកនាំដោយលោក ថោង រដ្ឋសក្តិ អគ្គនាយកនៃក្រសួងទេសចរណ៍ ដោយការចូលរួមពីបណ្ដាមន្ទីរពាក់ព័ន្ធនៃខេត្តទាំង៥ នៃតំបន់ទេសចរណ៍ភាគខាងត្បូង (ខេត្តកោះកុង កំពត កែប ខេត្តព្រះស៊ីហនុ និងខេត្តតាកែវ) ទីភ្នាក់ងារឯកជន៕