(កណ្ដាល)៖ ប្រជាពលរដ្ឋដែលជាជនជាតិខ្មែរឥស្លាម នៅស្រុកមុខកំពូល ខេត្តកណ្ដាល បានសម្ដែងនូវការឈឺចាប់យ៉ាងខ្លាំង ដែលទណ្ឌិត សម រង្ស៉ី បានប្រមាថព្រះចេស្ដារអង្គព្រះមហាក្សត្រ ដែលជាទីគោរពសក្ការៈដ៏ខ្ពង់ខ្ពស់បំផុត ហើយសំណូមពរឲ្យរាជរដ្ឋាភិបាល មេត្តាផ្ដន្ទាទោសបុគ្គល សម រង្ស៉ី ឲ្យកាន់តែធ្ងន់ធ្ងរជាទីបំផុត។

ខ្មែរឥស្លាមរូបនេះ ដែលតំណាងឲ្យខ្មែរឥស្លាមនៅស្រុកមុខកំពូល បានចាត់ទុកថា ទណ្ឌិត សម រង្ស៉ី កំពុងតែដើរតាមគន្លងឪពុករបស់ខ្លូន សម សារី ដែលជាជនក្បត់ជាតិ ក្បត់ព្រះមហាក្សត្រ ដូច្នេះហើយទោសទណ្ឌមួយនេះ មិនអាចលើកលែងឲ្យបាននោះទេ។

ក្នុងបទសម្ភាសន៍ខ្លីជាមួយភ្នាក់ងារ អង្គភាពព័ត៌មាន Fresh News ពលរដ្ឋខ្មែរឥស្លាមបានលើកឡើងយ៉ាងដូច្នេះថា «យើងខ្ញុំជាជនជាតិខ្មែរឥស្លាម នៅភូមិជ្រោយមេត្រីលើ ស្រុកមុខកំពូល ខេត្តកណ្ដាល តាងនាមខ្ញុំជួសមុខប្រជាជនខ្មែរឥស្លាមនៅឃុំជ្រោយឫស្សីលើ យើងខ្ញុំមានការឈឺចាប់ណាស់ ចំពោះអាជនក្បត់ សម រង្ស៉ី នេះបានជេរប្រមាថដល់ព្រះមហាក្សត្រ វាមើលងាយដល់ប្រទេសកម្ពុជា មើលងាយទាំងរាជរដ្ឋាភិបាល មើលងាយទាំងប្រជាជន មើលងាយរាជបល្ល័ង។

ចឹងបានសេចក្ដីថា អាក្បត់ជាតិ សម រង្ស៉ី មិនមែនមនុស្សធម្មតាទេ ចឹងខ្ញុំសូមសំណូមពរដល់រាជរដ្ឋាភិបាល មេត្ដាថាបើលោក សម រង្ស៉ី ចូលប្រទេសកុំអនុគ្រោះ ទោសគាត់មិនត្រឹមតែដាក់គុកមួយជីវិតទេ សមតែប្រហារជីវិតបានសម ព្រោះទំហំប្រជាជនដែលឈឺចាប់ ព្រោះឪគាត់ក្បត់ជាតិហើយ ដល់កូនដើរតាមគន្លងទៀត»។

សូមជំរាបថា នៅក្នុងកិច្ចសម្ភាសន៍វិទ្យុអាស៊ីសេរី (RFA) នាយប់ថ្ងៃទី២០ ខែកញ្ញា ឆ្នាំ២០១៩ កន្លងទៅ, សម្តីជនថោកទាប ក្បត់ជាតិសាសន៍ ក្បត់ព្រះមហាក្សត្រគឺទណ្ឌិត សម រង្ស៉ី បានបន្តប្រមាថព្រះករុណា ព្រះបាទ សម្តេចព្រះនរោត្តម សីហមុនី ព្រះមហាក្សត្រ នៃព្រះរាជាណាចក្រកម្ពុជា ដែលជាទីគោរពដ៏ខ្ពង់ខ្ពស់បំផុតនៃរាស្រ្តខ្មែរ យ៉ាងធ្ងន់ធ្ងរបំផុតនៅក្នុងកម្មវិធី Hello VOA ដោយប្រើពាក្យប្រមាថធ្ងន់ៗបំផុត។

សម្តីជនថោកទាប សម រង្ស៉ី បាននិយាយយ៉ាងដូច្នេះថា៖ «...ព្រះមហាក្សត្រមិនដែលបើកព្រះនេត្រ ឃើញទុក្ខវេទនារបស់ប្រជារាស្រ្តខ្មែរទេ ព្រះមហាក្សត្រសព្វថ្ងៃ ដូចខ្ញុំនិយាយម្តងទៀត ចង់កាត់ទោសខ្ញុំមួយម៉ឺនដងទៀត អត់ខ្វល់ដែរ ព្រះមហាក្សត្រសព្វថ្ងៃ ជាចំណាប់ខ្មាំងរបស់ ហ៊ុន សែន ព្រះមហាក្សត្រសព្វថ្ងៃជាអាយ៉ងរបស់ ហ៊ុន សែន ព្រះមហាក្សត្រសព្វថ្ងៃ ធ្វើអ្វីតាមដែល ហ៊ុន សែន បញ្ជាឲ្យព្រះអង្គធ្វើទាំងអស់ ដូច្នេះព្រះមហាក្សត្រសព្វថ្ងៃ ជាព្រះមហាក្សត្រអត់បានការ អត់ប្រយោជន៍ ខ្ញុំអត់ចាប់អារម្មណ៍ អត់គោរពព្រះមហាក្សត្រសព្វថ្ងៃ....»។

រដ្ឋធម្មនុញ្ញនៃព្រះរាជាណាចក្រកម្ពុជា មាត្រា៧ បានចែងថា «អង្គព្រះមហាក្សត្រ មិនអាចនរណារំលោភបំពានបានឡើយ»។ មាត្រា៨ បានចែងថា «ព្រះមហាក្សត្រ ព្រះអង្គទ្រង់ជានិមិត្តរូបនៃឯកភាពជាតិ និងនិរន្តរ៍ភាពជាតិ។ ព្រះមហាក្សត្រ ទ្រង់ជាអ្នកធានាឯករាជ្យជាតិ អធិបតេយ្យ និងបូរាណភាពទឹកដីនៃព្រះរាជាណាចក្រកម្ពុជា ទ្រង់ជាអ្នកធានាការគោរពសិទ្ធិ និងសេរីភាពរបស់ប្រជាពលរដ្ឋ និងការគោរពសន្ធិសញ្ញាអន្តរជាតិ»។

ជនក្បត់ជាតិ សម រង្ស៉ី បានប្រកាសនឹងវិលត្រឡប់មកកម្ពុជាវិញនៅថ្ងៃទី០៩ ខែវិច្ឆិកា ឆ្នាំ២០១៩ខាងមុខ ដើម្បីប្រឆាំង និងផ្តួលរបបដឹកនាំដោយសម្តេចតេជោ ហ៊ុន សែន បច្ចុប្បន្ន។ ការវិលត្រឡប់នេះត្រូវបានរាជរដ្ឋាភិបាលកម្ពុជា ប្រកាសថា ជាការប៉ុនប៉ងធ្វើរដ្ឋប្រហាររាជរដ្ឋាភិបាលស្របច្បាប់ កើតចេញពីការបោះឆ្នោត៕