(ភ្នំពេញ)៖ បើទោះបីជាជំងឺកូវីដ១៩ (COVID-19) បាននិងកំពុងកើតមានរាល់ថ្ងៃនៅកម្ពុជាយ៉ាងណាក្តី តែសម្តេចតេជោ ហ៊ុន សែន នាយករដ្ឋមន្ត្រីកម្ពុជា បានបង្ហាញជំនឿចិត្តមុតមាំថា កម្ពុជានឹងយកឈ្នះលើជំងឺកូវីដ១៩នេះ តាមរយៈការរួបរួមគ្នាប្រយុទ្ធ និងការពារពីសំណាក់ប្រជាពលរដ្ឋខ្មែរនៅទូទាំងប្រទេស។

ជំងឺកូវីដ១៩ដែលបានកើតមាននៅកម្ពុជាកាលពីខែមករាមកនោះ មកដល់ពេលបច្ចុប្បន្នបានរីកសាយភាយទៅកាន់ដែនដី១៣រាជធានី-ខេត្ត ហើយមនុស្សសរុប ៩៣នាក់ បានឆ្លងមេរោគនេះ។ អ្នកឆ្លងនេះមានពលរដ្ឋខ្មែរ ៣៥នាក់ ក្រៅពីនោះជាជនបរទេសមានដូចជា ចិន បារាំង អង់គ្លេស អាមេរិក ប៊ែលហ្ស៉ិក កាណាដា និងម៉ាឡេស៊ី។ ក្នុងចំណោមអ្នកឆ្លង ៩៣នាក់នេះ បានព្យាបាលឱ្យជាសះស្បើយចំនួន ៦នាក់ រួមមានបុរសជនជាតិចិន និងស្ត្រីជនជាតិអង់គ្លេស ព្រមទាំងជនជាតិខ្មែរ ៤នាក់។

ក្នុងជំនួបសំណេះសំណាលជាមួយក្រុមគ្រូពេទ្យស្ម័គ្រចិត្តប្រយុទ្ធជំងឺកូវីដ១៩ ចំនួន ៤២២នាក់នៅវិមានសន្តិភាព នាថ្ងៃទី២៥ ខែមីនា ឆ្នាំ២០២០ សម្តេចតេជោ ហ៊ុន សែន បានបង្ហាញគោលការណ៍ចំនួន៣ ដើម្បីឆ្លើយតបនឹងជំងឺកូវីដ១៩ ដែលសម្តេចចាត់ទុកជាសត្រូវគ្មានស្រមោលនេះ។ គោលការណ៍ទាំង៣នេះ រួមមាន៖ ការប្រឹងប្រែងទប់ស្កាត់កុំជំងឺឆ្លងបន្តពីក្រៅប្រទេស ប្រឹងប្រែងទប់ស្កាត់កុំឱ្យឆ្លងរាលដាលបន្ត និងត្រូវប្រឹងប្រែងព្យាបាលអ្នកដែលឆ្លងឱ្យជាកុំឱ្យគ្រោះថ្នាក់ដល់អាយុជីវិត។

ដើម្បីសម្រេចបានគោលការណ៍ទាំងនេះ សម្តេចតេជោ ហ៊ុន សែន បានក្រើនរំលឹកឱ្យយកចិត្តទុកដាក់បង្កើនការត្រួតពិនិត្យនៅតាមព្រលានយន្តហោះ ហើយបង្កើនការផ្សព្វផ្សាយអប់រំដល់ប្រជាពលរដ្ឋពីវិធានរក្សាអនាម័យ និងបង្ការជំងឺកូវីដ១៩ តាមសាររបស់ក្រសួងសុខាភិបាល។

បន្ថែមពីលើនេះ ដើម្បីធានាដល់ការព្យាបាលអ្នកបានកើតជំងឺកូវីដ១៩នោះ រាជរដ្ឋាភិបាលបានបញ្ចេញកម្លាំងគ្រូពេទ្យរហូតដល់ទៅ៤ផ្នែករួមមាន៖ ពេទ្យរដ្ឋ ពេទ្យយោធា ពេទ្យនគរបាល និងពេទ្យស្ម័គ្រចិត្ត។ សម្តេចតេជោ ហ៊ុន សែន ក៏បានប្រកាសបញ្ជាទិញគ្រប់សម្ភារៈ បរិក្ខារបម្រើឱ្យការប្រយុទ្ធនឹងជំងឺកូវីដ១៩ដោយឥតលក្ខខណ្ឌ ដើម្បីបង្កើនប្រសិទ្ធភាពក្នុងការប្រយុទ្ធជំងឺដែលពិភពលោកខ្លាចរអានេះ។

ទោះបីមានវិធានការខាងលើនេះយ៉ាងណាក្តី តែការប្រយុទ្ធនឹងជំងឺកូវីដមិនអាចទទួលបានជោគជ័យនោះឡើយ បើខ្វះការចូលរួមពីប្រជាពលរដ្ឋនោះ។ ក្នុងន័យនេះ សម្តេចតេជោ ហ៊ុន សែន អំពាវនាវដល់ប្រជាពលរដ្ឋនៅទូទាំងប្រទេសឱ្យចូលរួមទាំងអស់គ្នា ក្នុងការអនុវត្តន៍នូវវិធានអនាម័យទាំងឡាយ ដែលក្រសួងសុខាភិបាលបានណែនាំ។

សូមបញ្ជាក់ថា គ្រូពេទ្យស្ម័គ្រចិត្តប្រយុទ្ធនឹងជំងឺកូវីដ១៩ ដែលត្រូវបានជ្រើសរើស ដើម្បីធ្វើសកម្មភាពប្រយុទ្ធនឹងជំងឺកូវីដ១៩ មានចំនួន៤២២នាក់។ សម្តេចតេជោ ហ៊ុន សែន បានប្រកាសឧបត្ថម្ភថវិកាមួយថ្ងៃ៤ម៉ឺនរៀលដល់ក្រុមគ្រូពេទ្យស្ម័គ្រចិត្តទាំងអស់នេះ។ ក្នុងមួយខែសម្តេចតេជោ ចំណាយជាង ៥០ម៉ឺនដុល្លារសម្រាប់ឧបត្ថម្ភដល់ក្រុមគ្រូពេទ្យស្ម័គ្រចិត្ត។

សម្តេចតេជោ ហ៊ុន សែន បានកោតសរសើរដល់ក្រុមគ្រូពេទ្យស្ម័គ្រចិត្ត ក៏ដូចជាអាណាព្យាបាលរបស់ពួកគេ ដែលបានចូលរួមក្នុងបេសកកម្មប្រយុទ្ធជំងឺកូវីដ១៩៕