(កំពង់ធំ)៖ លោកស្រីកិត្តិសង្គហបណ្ឌិត ម៉ែន សំអន ឧបនាយករដ្ឋមន្ត្រី រដ្ឋមន្ត្រីក្រសួងទំនាក់ទំនងជាមួយរដ្ឋសភា-ព្រឹទ្ធសភា និងអធិការកិច្ច បានអញ្ជើញជាអធិបតីក្នុងពិធីសម្ពោធដាក់ឲ្យប្រើប្រាស់ស្ពានបេតុង ឆ្លងស្ទឹងសែន ស្ថិតក្នុងភូមិកំពង់ស្វាយ ឃុំកំពង់ស្វាយ ស្រុកកំពង់ស្វាយ ខេត្តកំពង់ធំ នៅព្រឹកថ្ងៃទី០៩ ខែមេសា ឆ្នាំ២០២២នេះ។
ថ្លែងក្នុងឱកាសនោះ លោកស្រី ម៉ែន សំអន បានបញ្ជាក់ថា ក្រោមការដឹកនាំប្រកបដោយភាពប៉ិនប្រសប់ និងគតិបណ្ឌិតរបស់សម្ដេចតេជោ ហ៊ុន សែន នាយករដ្ឋមន្ត្រីនៃព្រកម្ពុជា ដែលជាអគ្គមគ្គុទេសន៍ឯក និងជាប្រតិបត្តិករនយោបាយឈ្នះឈ្នះ ដែលបាននាំយកសន្តិភាពមកជូនជាតិមាតុភូមិកម្ពុជា ឆ្ពោះទៅរកការអភិវឌ្ឍន៍គ្រប់វិស័យ ដោយបានផ្តោតទៅលើអាទិភាព ៤ គឺ ផ្លូវ មនុស្ស ទឹក ភ្លើង។
ដោយឡែកថ្ងៃនេះ សមិទ្ធផលស្ពានបេតុងថ្មីនេះ ក៏បានបង្ហាញជំនឿ និងការសាមគ្គី ដែលកើតចេញមកពីកត្តាសុខសន្តិភាព ដែលបានអនុញ្ញាតឲ្យបងប្អូនទាំងអស់គ្នា ចូលរួមកសាងនូវសមិទ្ធផលដែលដាក់សម្ពោធនាថ្ងៃនេះ និងបានចូលរួមចំណែកជំរុញឲ្យមានការអភិវឌ្ឍ។
ស្ពានបេតុងនេះ មានប្រវែង១៥១.២ម៉ែត្រ ទទឹង៦.៥០ម៉ែត្រ គឺក្រោមគំនិតផ្តួចផ្តើមរបស់ លោកស្រី ឃួន ឃុនឌី សមាជិកាគណៈកម្មការទី៥ ព្រឹទ្ធសភា និងជាសមាជិកាព្រឹទ្ធសភាប្រចាំភូមិភាគទី៨ និងលោកឧកញ៉ា កុយ លាងគី គណៈកម្មការអាចារ្យវត្តកំពង់ស្វាយ រួមជាមួយ ប្រជាពលរដ្ឋ អាជីវករ មន្រ្តីរាជការ កងកម្លាំង និងសប្បុរសជន បានមូលមតិគ្នាចាប់ផ្តើមកសាងតាំងពីឆ្នាំ២០១៨ និងរួចរាល់ជាស្ថាពរ នៅឆ្នាំ២០២១ ដោយចំណាយថវិកាអស់ជិត៦៣ម៉ឺនដុល្លារ។
សូមបញ្ជាក់ផងដែរថា ការសាងសង់ស្ពាននេះគឺ ទី១៖ ប្រជាពលរដ្ឋធ្វើដំណើរឆ្លងកាត់ និងដឹកជញ្ជូនកសិផលនានា ជួបការលំបាកជាខ្លាំង, ទី២៖ សិស្សានុសិស្សក្នុងភូមិ និងភូមិផ្សេងៗធ្វើដំណើរទៅសាលារៀនជួបការលំបាកជាខ្លាំង, ទី៣៖ ពេលមានបុណ្យទានម្ដងៗព្រះសង្ឃ និងពុទ្ធបរិសទ្ធិជិតឆ្ងាយធ្វើដំណើរឆ្លងកាត់មកវត្តទាំងក្ដីភ័យខ្លាច និងព្រួយបារម្ភយ៉ាងខ្លាំង។
ជាក់ស្ដែងនៅឆ្នាំ១៩៨២ គឺមានករណីលិចកាណូត នៅពេលដែលប្រជាពលរដ្ឋដង្ហែរអង្គកឋិនទាន មកកាន់វត្តកំពង់ស្វាយ តាមកាណូត ដោយធ្វើឲ្យប្រជាពលរដ្ឋមកបុណ្យស្លាប់អស់ចំនួន៥២នាក់ យ៉ាងអណោចអាធ័មបំផុត ក្នុងនោះក៏មានសមាជិករបស់ក្រុម គ្រួសារលោកស្រី ឃួន ឃុនឌី ចំនួន៤នាក់ផងដែរ។
លោកស្រី ម៉ែន សំអន បានផ្តាំផ្ញើដល់ប្រជាពលរដ្ឋទាំងអស់គ្នា ត្រូវចូលរួមគោរពច្បាប់ចរាចរណ៍ រៀនរស់ និងធ្វើការតាមប្រក្រតីភាពថ្មី ដោយអនុវត្តតាមវិធានការណ៍ ៣ការពារ ៣កុំ។ ចំណែកឯកងកម្លាំង និងសមត្ថកិច្ចពាក់ព័ន្ធ ត្រូវចូលរួមការពារ សន្តិសុខ សណ្តាប់ធ្នាប់សាធារណៈនៅក្នុងមូលដ្ឋានរៀងៗខ្លួន ជាពិសេស នៅថ្ងៃចូលឆ្នាំប្រពៃណីជាតិខ្មែរ ដែលនឹងឈានចូលកដល់នាពេលខាងមុខនេះប្រកបដោយសុខ និងសុវត្ថិភាពខ្ពស់៕
