(ភ្នំពេញ)៖ លោក Peter Sykora មេបញ្ជាការទទួលកិច្ចការនគរបាលសហព័ន្ធអូស្រ្តាលីប្រចាំតំបន់អាស៊ី បានចូលរួមអបអរសាទរចំពោះជោគជ័យរបស់កម្ពុជា ដែលត្រូវបានដកចេញពីបញ្ជីប្រផេះ នៃក្រុមប្រទេសដែលមានហានិភ័យខាងលាងលុយកខ្វក់របស់អង្គការ (FATF) និងបានកោតសរសើរនូវកិច្ចខិតខំប្រឹងប្រែងរបស់នគរបាលជាតិកម្ពុជា ដែលជាផ្នែកមួយសំខាន់ដែលនាំឲ្យកម្ពុជាសម្រេចបានលើកាងារនេះ។
ការចូលរួមអបអរសាទរជាមួយកម្ពុជា និយាយជារួម និងនិយាយដោយឡែក ជាមួយនគរបាលជាតិកម្ពុជានេះ ធ្វើឡើងនៅរសៀលថ្ងៃទី០៨ ខែមីនា ឆ្នាំ២០២៣ ក្នុងឱកាសដែលលោកមេបញ្ជាការទទួលកិច្ចការនគរបាលសហព័ន្ធអូស្រ្តាលីប្រចាំតំបន់អាស៊ី ត្រូវបាននាយឧត្តមសេនីយ៍ សន្ដិបណ្ឌិត នេត សាវឿន អគ្គស្នងការនគរបាលជាតិ អនុញ្ញាតឲ្យចូលជួបសម្ដែងការគួរសម និងពិភាក្សាការងារ នៅអគ្គស្នងការដ្ឋាននគរបាលជាតិ។
លោក Peter Sykora មេបញ្ជាការទទួលកិច្ចការនគរបាលសហព័ន្ធអូស្រ្តាលីប្រចាំតំបន់អាស៊ី បានថ្លែងអំណរគុណចំពោះការស្វាគមន៍យ៉ាងកក់ក្តៅរបស់ នាយឧត្តមសេនីយ៍ សន្តិបណ្ឌិត នេត សាវឿន និងបាននាំនូវពាក្យផ្តាំផ្ញើសាកសួរសុខទុក្ខរបស់អគ្គស្នងការនគរបាលសហព័ន្ធអូស្ត្រាលី ជូនចំពោះនាយឧត្តមសេនីយ៍ សន្តិបណ្ឌិត អគ្គស្នងការនគរបាលជាតិផងដែរ។
ជាមួយគ្នានោះ ភាគីនគរបាលសហព័ន្ធអូស្រ្តាលី បានថ្លែងអំណរគុណ និងកោតសរសើរចំពោះលទ្ធផល នៃកិច្ចសហប្រតិបត្តការរវាងនគរបាលសហព័ន្ធអូស្ត្រាលី និងនគរបាលជាតិកម្ពុជា តាមរយៈក្រុមការងារ TCT និងអរគុណដល់អគ្គស្នងការនគរបាលជាតិកម្ពុជា ដែលតែងតែគាំទ្រដល់នគរបាលសហព័ន្ធអូស្រ្តាលីនៅក្នុងមជ្ឈមណ្ឌល TCT ផងដែរ។ ភាគីអូស្ត្រាលី ក៏បានវាយតម្លៃខ្ពស់ចំពោះក្រុមការងារ TCT កម្ពុជាធ្វើជាគំរូដែលអាចយកទៅបង្កើតនៅប្រទេសដទៃផ្សេងទៀតនៅពេលខាងមុខ។
នគរបាលសហព័ន្ធអូស្ត្រាលី បានសន្យាបន្តគាំទ្រនគរបាលជាតិកម្ពុជា លើការបើកវគ្គបណ្តុះបណ្តាលជំនាញជូនដល់មន្ត្រីសិក្ខាកាម ដើម្បីយកទៅបំពេញភារកិច្ចឲ្យចំគោលដៅ។
ថ្លែងក្នុងឱកាសនោះ នាយឧត្តមសេនីយ៍ សន្តិបណ្ឌិត នេត សាវឿន បានថ្លែងអំណរគុណចំពោះការចំណាយពេលវេលាដ៏មានតម្លៃរបស់ លោកមេបញ្ជាការទទួលកិច្ចការនគរបាលសហព័ន្ធអូស្រ្តាលីប្រចាំតំបន់អាស៊ី ដែលបានមកបំពេញទស្សនកិច្ចនៅកម្ពុជា និងបានថ្លៃងការកោតសរសើរ និងវាយតម្លៃខ្ពស់ចំពោះទំនាក់ទំនងដ៏ជិតស្និទ្ធរវាងអគ្គស្នងការនគរបាលជាតិ ក៏ដូចជាថ្នាក់ដឹកនាំនគរបាលជាតិ នៃប្រទេសទាំងពីរ។
នាយឧត្តមសេនីយ៍ នេត សាវឿន ក៏បានថ្លែងអំណរគុណនូវការជួយជ្រោមជ្រែងរបស់នគរបាលអូស្រ្តាលី ដែលរយៈកាលកន្លងមកដូចជា ការផ្តល់ទីប្រឹក្សាក្នុងការដាក់ចេញនូវយុទ្ធសាស្ត្រគោលនយោបាយនគរបាលជាតិកម្ពុជា ជួយគាំទ្របង្កើតក្រុមការងារ TCT និងការជួយបណ្តុះបណ្តាលទាំងការកសាងសមត្ថភាពមន្ត្រី ការជួយមធ្យោបាយ សម្ភារៈ និងគម្រោងធំៗដទៃទៀត។
នាយឧត្តមសេនីយ៍ អគ្គស្នងការនគរបាលជាតិ ក៏បានថ្លែងនូវការកោតសរសើរ និងវាយតម្លៃខ្ពស់ចំពោះកិច្ចសហប្រតិបត្តការ និងការជួយគាំទ្រទាំងនេះ និងស្នើឲ្យភាគីអូស្រ្តាលីជួយគាំទ្របន្ថែមទៀត ជាពិសេសគឺការបណ្តុះបណ្តាលជំនាញប្រយុទ្ធប្រឆាំងបទល្មើសបច្ចេកវិទ្យា ដែលជាប្រភេទបទល្មេីសកំពុងមាននិន្នាការកើនឡើងជារួម នៅក្នុងបណ្តាប្រទេសតំបន់អាស៊ី។
ជាចុងក្រោយ នាយឧត្តមសេនីយ៍ សន្តិបណ្ឌិត នេត សាវឿន ក៏បានជូនពរឲ្យដំណើរបំពេញទស្សនកិច្ចរបស់លោក Peter Sykora មេបញ្ជាការទទួលកិច្ចការនគរបាលសហព័ន្ធអូស្រ្តាលីប្រចាំតំបន់អាស៊ី បានទទួលជោគជ័យ និងការស្នាក់នៅប្រកបដោយសុវត្ថិភាព ផាសុខភាពក្នុងប្រទេសកម្ពុជា៕
