(ភ្នំពេញ)៖ ក្មេងស្ទាវមួយក្រុមប្រមាណ១៤នាក់ ជិះម៉ូតូចំនួន ០៧គ្រឿង ប្រដាប់ដោយ ដាវ កាំបិត និងផ្គាក់ ដែលបានធ្វើសកម្មភាពកាប់លើជនរងគ្រោះត្រូវចំនួន ២កន្លែង ត្រង់ខ្នង និងមុខ (មុតរយៈដេរចំនួន ២៤ថ្នេរ) នៅសង្កាត់កាកាប១ ខណ្ឌពោធិ៍សែនជ័យ ត្រូវបានកម្លាំងអាវុធហត្ថរាជធានីភ្នំពេញ ចាប់ខ្លួនបានម្នាក់ហើយ និងកំពុងកសាងសុំណុំរឿងបញ្ជូនទៅតុលាការ ខណៈបក្ខពួកផ្សេងទៀតកំពុងតាមចាប់ខ្លួន។

កម្លាំងអាវុធហត្ថ បានឱ្យបណ្តាញព័ត៌មាន Fresh News ដឹងនៅថ្ងៃទី២៥ ខែមេសា ឆ្នាំ២០២៤នេះថា កាលពីថ្ងៃទី២០ ខែមេសា ឆ្នាំ២០២៤ មានករណីក្មេងស្ទាវមួយក្រុម ប្រមាណ១៤នាក់ ជិះម៉ូតូចំនួន ០៧គ្រឿង ប្រដាប់ដោយ ដាវ កាំបិត និងផ្គាក់ បានធ្វើសកម្មភាពកាប់លើជនរងគ្រោះត្រូវចំនួន ២កន្លែង ត្រង់ខ្នង និង មុខ (មុតរយៈដេរចំនួន២៤ថ្នេរ) ព្រមទាំងកាប់លើម៉ូតូមិត្តភក្តិរបស់ជនរងគ្រោះបណ្តាលឲ្យខូចខាតយ៉ាងដំណំផងដែរ នៅចំណុចបន្ទប់ជួលលេខ៨ ភូមិក្បាលដំរី១ សង្កាត់កាកាប១ ខណ្ឌពោធិ៍សែនជ័យ រាជធានីភ្នំពេញ។

ក្រោយពេលទទួលបានបណ្តឹងពីក្រុមគ្រួសារជនរងគ្រោះរួចមក កម្លាំងជំនាញអាវុធហត្ថរាជធានីភ្នំពេញ ក្នុងមូលដ្ឋានខណ្ឌពោធិ៍សែនជ័យ បានធ្វើការស្រាវជ្រាវ និងឈានដល់ការឃាត់ខ្លួនជនដៃដល់ ឈមោះ ឡៃ មករា ភេទប្រុស អាយុ១៩ឆ្នាំ នាំយកមកមូលដ្ឋានខណ្ឌ និងធ្វើការស្តាប់ចម្លើយតាមនីតិវិធី។ ជនសង្ស័យបានសារភាពឲ្យដឹងថា នៅថ្ងៃកើតហេតុខាងលើ ខ្លួននិងបក្ខពួកជាច្រើននាក់ទៀត ពិតជាបាននាំគ្នាដេញកាប់ទៅលើជនរងគ្រោះបណ្តាលឲ្យរងរបួសពិតប្រាកដមែន។

បច្ចុប្បន្នជនសង្ស័យខាងលើ កំពុងត្រូវបានកម្លាំងជំនាញការិយាល័យប្រឆាំងបទល្មើសព្រហ្មទណ្ឌ នៃកងរាជអាវុធហត្ថរាជធានីភ្នំពេញ កសាងសុំណុំរឿងបញ្ជូនទៅតុលាការ ដើម្បីចាត់ការតាមនីតិវិធីច្បាប់ ចំណែកបក្ខពួកដែលរត់គេច សមត្ថកិច្ចជំនាញ អាវុធហត្ថរាជធានីភ្នំពេញ កំពុងស្រាវជ្រាវស្វែងរកចាប់ខ្លួនបន្តទៀត៕