(ភ្នំពេញ)៖ សម្តេចតេជោ ហ៊ុន សែន ប្រធានព្រឹទ្ធសភា និងជាប្រធានកិត្តិយស «សមាគមឧកញ៉ាកម្ពុជា» នៅថ្ងៃទី២៦ ខែមេសា ឆ្នាំ២០២៤នេះ បានថ្លែងទៅកាន់ក្រុមមនុស្សលោកខាងលិច ដែលតែងរិះគន់សម្តេចថា ពួកគេគ្រាន់តែមានវាសនា កើតលើប្រទេសអ្នកមាន ប៉ុន្តែខួរក្បាលរបស់ពួកគេ មិនប្រាកដថាខ្លាំងជាងសម្តេចនោះទេ។
ការថ្លែងបែបនេះ ធ្វើឡើងក្នុងឱកាសដែល សម្តេចតេជោ ហ៊ុន សែន អញ្ជើញជាអធិបតីភាពដ៏ខ្ពង់ខ្ពស់ ក្នុងពិធីពិសាអាហារសាមគ្គីមហាគ្រួសារឧកញ៉ាកម្ពុជា ដើម្បីអបអរសាទរសន្និបាត ប្រចាំឆ្នាំលើកទី១ របស់ «សមាគមឧកញ៉ាកម្ពុជា» នៅសណ្ឋាគារហ្គាឌិនស៊ីធី របស់អ្នកឧកញ៉ា លី យ៉ុងផាត់ ប្រធានសមាគមឧកញ៉ាកម្ពុជា នាល្ងាចថ្ងៃទី២៦ ខែមេសា ឆ្នាំ២០២៤។
សម្តេចតេជោ ហ៊ុន សែន បានបញ្ជាក់ថា «ខ្ញុំចេះតែនិយាយថា ពួកអ្នកឯង មានសំណាងគ្រាន់តែអ្នកឯង កើតទៅក្នុងប្រទេសអ្នកមានទេ ប៉ុន្ដែខួរក្បាលរបស់អ្នកឯង មិនប្រាកដថា ពូកែជាងខ្ញុំទេ។ ជាក់ស្តែងជំងឺកូវីដ-១៩ ពួកអ្នកឯង ដែលចាត់ទុកថា ជាប្រទេសអ្នកមានធនធាន ឬប្រព័ន្ធសុខាភិបាលរឹងមាំ ប៉ុន្ដែអ្នកស្លាប់ និងអ្នកឆ្លងនៅក្នុងប្រទេសអ្នកឯង មានច្រើនជាងប្រទេសខ្ញុំ»។
ការចេញមកបញ្ជាក់បែបនេះ របស់សម្ដេចតេជោ ក្រោយមានអ្នកសរសេរកាសែតម្នាក់ នៅប្រទេសខាងលិច បាននិយាយថា ការខុសគ្នារវាង ហ៊ុន សែន និង ហ៊ុន ម៉ាណែត នៅត្រង់ថា សន្ទរកថា ហ៊ុន សែន ដាក់ចេញទៅមានចរិត ជាការបញ្ជា ឯ ហ៊ុន ម៉ាណែត គ្មានចរិតបញ្ជាទេ។
ជាការឆ្លើយតប សម្ដេចតេជោ ហ៊ុន សែន បានឆ្លើយតបទៅពួកគេវិញថា «ចាំមើលអ្នកឯងធ្វើ ខ្ញុំចាំមើល បើតំណែងហ្នឹង ទីកន្លែងអង្គុយតម្រូវឲ្យបញ្ចេញបញ្ជា គឺត្រូវតែចេញបញ្ជា»។
សម្ដេចតេជោ ហ៊ុន សែន បានបញ្ជាក់ជូនទៅកាន់ ក្រុមមនុស្សលោកខាងលិចថានោះថា «ពួកអ្នកឯងមានសំណាង ត្រឹមតែកើតនៅក្នុងប្រទេសអ្នកមាន អ្នកឯងមើលងាយខ្ញុំ ប៉ុន្ដែខួរក្បាលរបស់អ្នកឯង មិនប្រាកដថា ពូកែជាងពួកខ្ញុំនោះទេ។ បើសិនជាស្ថិតក្នុងសភាពដូចកម្ពុជា ប្រហែលជាពួកអ្នកឯងរត់ចោលជួរទៅហើយ»៕
