(ភ្នំពេញ)៖ ផលិតកម្ម សាន់ដេ បានបញ្ចេញនូវអាល់ប៊ុម MV ថ្មីមួយទៀត ដែលជាការបកស្រាយរួមគ្នា របស់កំពូលតារាចម្រៀង សម្ដីផ្អែមស្រទន់ កញ្ញា សុខ ពិសី និង លោក ខេមរៈ សិរីមន្ត ជាប្រភេទអាល់ប៊ុមសាច់រឿង កំពុងតែផ្ទុះកក្រើកជាថ្មី ពីសំណាក់អ្នកគាំទ្រ ជាពិសេសយុវវ័យ ខណៈការសម្ដែងមានភាពរស់រវើក ល្អឥតខ្ចោះរបស់កំពូលតារាចម្រៀង ទាំងពីរដួង។
សម្រាប់តារាចម្រៀង មានឈ្មោះបោះសំឡេងល្បីរន្ទឺ ក្នុងប្រទេសកម្ពុជា កញ្ញា សុខ ពិសី បានបង្ហាញនូវឈុតឆាកពិសេសជាច្រើន ក្នុងសាច់រឿង ដែលត្រូវបានថតចេញជា MV បទចម្រៀង ជាមួយនឹង កំពូលតារាចម្រៀង ខេមរៈ សិរីមន្ត ខណៈដែលបទចម្រៀង ទើបតែចេញជា Trailler MV រយៈពេលប្រមាណ២ទៅ៣ថ្ងៃ ប៉ុណ្ណោះឃើញថា មានអ្នកចូលទស្សនា ប្រមាណជិត៦ពាន់នាក់ ឯណោះ។
អ្វីដែលជាការលោតឡើង គួរឲ្យចាប់អារម្មណ៍ក្នុងអាល់ប៊ុម MV នេះ គឺបទ «ចោលអ្នកស្មោះជ្រើសអ្នកក្បត់» ដែលជាការបកស្រាយរបស់ កំពូលតារាចម្រៀង ខេមរៈ សិរីមន្ត និងជាការសម្ដែង ដោយកំពូលតារាចម្រៀង សម្ដីមានមន្តស្នេហ៍ កញ្ញា សុខ ពិសី និងម្ចាស់បទ ដែលធ្វើឲ្យអ្នកទស្សនា ខំផ្ចិតផ្ចង់មើលមិនដាក់ភ្នែក។
ងាកមកមើលក្នុង Page Facebook ផ្លូវការរបស់ ផលិតកម្ម សាន់ដេ ឯណេះវិញ ក៏បានបង្ហាញ Trailler MV បទ «ចោលអ្នកស្មោះជ្រើសអ្នកក្បត់» អមជាមួយនឹងប្រយោគថា «ពិតមែនហើយខ្ញុំជាមនុស្សល្ងង់ ប៉ុន្ដែសូមកុំទៅចោលមនុស្សល្ងង់ម្នាក់នេះ បានទេខ្ញុំពិតជាឈឺចាប់ខ្លាំងណាស់...ឈឺចាប់បំផុត ពេលមើលឃើញមនុស្ស ដែលខ្ញុំស្រឡាញ់កំពុងដើរធ្លាក់ ក្នុងរណ្ដៅ ប៉ុន្តែខ្ញុំមិនអាចការពារនាងបាន..ដឹងថា បងជាមនុស្សល្ងង់ មានចិត្តស្មោះត្រង់ និងស្រស់មាសមេ...មិនដូចគេ..ដូចគេ..ឆ្លាតតែក្បត់..!» ដែលសុទ្ធតែជាប្រយោគ បង្ហាញពីអារម្មណ៍ពិតរបស់តួឯកប្រុស គឺលោក ខេមរៈ សិរីមន្ត។
សូមទស្សនា Trailler MV បទ «ចោលអ្នកស្មោះជ្រើសអ្នកក្បត់» ទាំងអស់គ្នា ថាតើមានភាពទាក់ទាញកម្រិតណា?
