(ភ្នំពេញ)៖ លោក កឹម សុខា ដែលទើបជាប់ឆ្នោតជាប្រធានគណបក្សសង្រ្គោះជាតិពេញសិទ្ធិ នៅល្ងាចថ្ងៃទី០២ ខែមីនា ឆ្នាំ២០១៧នេះ បានផ្ញើលិខិតថ្លែងអំណរគុណជូនចំពោះសម្តេចតេជោ ហ៊ុន សែន​ ប្រធានគណបក្សប្រជាជនកម្ពុជា បន្ទាប់ពីលោកបានទទួលសារជូនពរ ពីសម្តេច នៅរសៀលថ្ងៃមិញ។

លិខិតរបស់លោក កឹម សុខា ដែលផ្ញើជូនសម្តេចតេជោ ហ៊ុន សែន ហើយអង្គភាព Fresh News ទើបទទួលបានប៉ុន្មនានា​ទីមុន​នេះ បានថ្លែងថា «ខ្ញុំសូមថ្លែងអំណរគុណ ចំពោះសម្តេច ដែលបានធ្វើលិខិតជូនពរខ្ញុំ ក្នុងឪកាសនេះ និងសូមជូនពរ​សម្តេច មានសុខភាពល្អ និងសុភមង្គលក្នុងគ្រួសារ»។

នៅរសៀលថ្ងៃនេះ​ សម្តេចតេជោ ហ៊ុន សែន ក្នុងនាមប្រធានគណបក្សប្រជាជនកម្ពុជា ដែលកំពុងដឹកនាំប្រទេស បានផ្ញើលិខិត​ជូនពរលោក កឹម សុខា ដែលទើបជាប់ឆ្នោតក្លាយជា ប្រធានគណបក្សសង្គ្រោះជាតិ ក្រោយអង្គសមាជបោះឆ្នោតជូននៅព្រឹកថ្ងៃទី០២ ខែមីនា ឆ្នាំ២០១៧។

នៅក្នុងលិខិតរបស់សម្តេចតេជោ ហ៊ុន សែន បានសរសេរជូនពរលោក កឹម សុខា យ៉ាងដូច្នេះថា៖ «ជូនឯកឧត្តម កឹម សុខា នៅក្នុងឱកាសដែល ឯកឧត្តម ត្រូវបានជ្រើសតាំងជាប្រធានគណបក្សសង្គ្រោះជាតិ ខ្ញុំសូមជូនពរឯកឧត្តមមានសុខភាពល្អ និងសុភមង្គលក្នុងគ្រួសារ។ សូមឯកឧត្តមទទួលនូវការរាប់អានពីខ្ញុំ»។

សូមជំរាបថា នៅព្រឹកមិញនេះ លោក កឹម សុខា ដែលកាន់តំណែងប្រធានស្តីទីជាង១ឆ្នាំ បានឡើងកាន់តំណែង​ប្រធានគណបក្សសង្រ្គោះជាតិ ជាផ្លូវការហើយ បន្ទាប់ពីសមាជិកជាច្រើនបោះឆ្នោតគាំទ្រនៅក្នុងសមាជវិសាមញ្ញនាព្រឹកថ្ងៃទី០២ ខែមីនា ឆ្នាំ២០១៧នេះ ខណៈ លោក ប៉ុល ហំម លោកស្រី មូរ សុខហួរ និង លោក អេង ឆៃអ៊ាង ត្រូវបានសមាជបោះឆ្នោតគាំទ្រឱ្យធ្វើជាអនុប្រធានគណបក្សប្រឆាំង៕