(ភ្នំពេញ)៖ យោងតាមរបាយការណ៍ក្រសួងរៀបចំដែនដី នគរូបនីយកម្មនិងសំណង់ បានឲ្យដឹងថា រយៈពេល៦ខែ ឆ្នាំ២០១៨ ទាំងសមត្ថកិច្ចក្រសួង និងរាជធានី-ខេត្ត បានផ្ដល់លិខិតអនុញ្ញាតសាងសង់បានចំនួន ១,៦៤៣គម្រោង ដែលមានតម្លៃវិនិយោគប្រមាណ ២,១៥៣,២១១,១១៨ដុល្លារសហរដ្ឋអាមេរិក។
របាយការណ៍បានឲ្យដឹងថា គម្រោងសាងសង់ទាំងនេះស្ថិតនៅលើផ្ទៃដីសុរប ៥,៣៥២,៤២២ម៉ែត្រក្រឡា។ ទុនវិនិយោគរបស់វិស័យឯកជនមកពីបរទេសមានចំនួន ៨ប្រទេស ស្មើនឹង ២១គម្រោង ទុនវិនិយោគមានតម្លៃប្រមាណ ៣៩៤,៣៣២,៣០០ដុល្លារ។ គម្រោងសាងសង់ទាំងនេះ បានផ្ដល់ការងារដល់អ្នកជំនាញ កម្មករប្រមាណ ១៨ម៉ឺននាក់ក្នុងមួយថ្ងៃ ព្រមទាំងទទួលបានប្រាក់ឈ្នួលពី ៤០០ដុល្លារ ទៅ ២,៥០០ដុល្លារក្នុងមួយខែ។
គួររម្លឹកថា វិស័យសំណង់បានបង្កើតការងារដល់ប្រជាពលរដ្ឋប្រមាណជា ២៥ម៉ឺននាក់ ទៅ ២៦ម៉ឺននាក់ ក្នុង១ថ្ងៃ នៅទូទាំងប្រទេស។ ដោយឡែកនៅរាជធានីភ្នំពេញ មានចំនួនកម្មករប្រមាណ ១២ម៉ឺននាក់ ទៅ១៣ម៉ឺននាក់ក្នុងមួយថ្ងៃ៕
