(ហ្វីលីពីន)៖ ព្យុះទីហ្វុងដ៏មានឥទ្ធិពល បាននឹងកំពុងវាយប្រហារ នៅភាគខាងជើងឈៀងខាងកើត នៃប្រទេសហ្វីលីពីន ក្នុងខេត្ត Cagayan បានធ្វើឲ្យប្រជាពលរដ្ឋរាប់ម៉ឺននាក់ ជម្លៀសខ្លួនចេញ និងការផ្គត់ផ្គង់អគ្គិសនីត្រូវបានកាត់ផ្តាច់ ជាច្រើនកន្លែងនៅតំបន់នោះ នេះបើយោងតាមព័ត៌មាន BBC ចេញផ្សាយនៅរាត្រីឈានចូលថ្ងៃទី១១ ខែឧសភា ឆ្នាំ២០១៥។
ព្យុះទីហ្វុងឈ្មោះ Noul នេះមានល្បឿន ២២០គីឡូម៉ែត្រក្នុងមួយម៉ោង, ព្យុះនេះត្រូវបានគេព្យាករណ៍ថា នឹងធ្វើដំណើរទៅកាន់កោះតៃវ៉ាន់ និងប្រទេសជប៉ុន។
លោក Rene Paciente ប្រធាននាយកដ្ឋាន អាកាសធាតុសមុទ្ររបស់ហ្វីលីពីន បាននិយាយថា «នេះគឺជាព្យុះដែលមានគ្រោះថ្នាក់ខ្លាំងណាស់។ វាជាព្យុះដ៏ខ្លាំងបំផុតនៅឆ្នាំនេះ»។
ចំណែកជើងហោះហើរជាច្រើន និងការធ្វើដំណើរដឹកជញ្ជូនតាមកប៉ាល់នានា ត្រូវបានប្រកាសលុបចោលដោយឥទ្ធិពលខ្យល់ព្យុះនេះ។ ដោយឡែកមិនទាន់មានរបាយការណ៍ណាមានអ្នកស្លាប់ និងរងរបួសនោះទេ។
ប្រទេសហ្វីលីពីនជាញឹកញាប់ ត្រូវបានគេមើលឃើញថា ទទួលនូវការគ្រោះអាកាសធាតុអាក្រក់ច្រើនដង ហើយមានមនុស្សជាង៧០០០នាក់ បានសម្លាប់ដោយសារព្យុះទីហ្វុង វាយប្រហារកាលពីឆ្នាំ២០១៣៕
