(ភ្នំពេញ)៖ មន្រ្តីជាន់ខ្ពស់នៃក្រសួងសេដ្ឋកិច្ច និងហិរញ្ញវត្ថុ បានលើកឡើងថា ការដែលរាជរដ្ឋាភិបាល ឬស្ថាប័នមួយចំនួនព្យាករណ៍ និងវាយតម្លៃថា កំណើនសេដ្ឋកិច្ចកើនឡើងក្នុងកម្រិតណាមួយ គឺដោយសារតែសកម្មភាពសេដ្ឋកិច្ចរបស់កម្ពុជា មានភាពល្អប្រសើរជាងមុន ដែលធ្វើឱ្យការព្យាករណ៍ទទួលបានកំណើនវិជ្ជមាន។ ​

លោក ផាន ផល្លា រដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ លើកឡើងបែបនេះ គឺឆ្លើយនឹងសំណួរ ដែលលើកឡើងថា ហេតុអ្វីការព្យាករណ៍សេដ្ឋកិច្ច មិនបានឆ្លុះបញ្ចាំងពីស្ថានភាពជាក់ស្តែង ពោលគឺ បើយោងតាមការព្យាករណ៍កំណើនសេដ្ឋកិច្ចកម្ពុជា នៅឆ្នាំ២០២៤នេះ ដែលធ្វើឡើងដោយស្ថាប័នផ្សេងៗដូចជា ធនាគារអភិវឌ្ឍន៍អាស៊ី (ADB) ជាដើម បានបង្ហាញថា សេដ្ឋកិច្ចកម្ពុជា​នឹងកើនឡើងក្នុងអត្រា ៥.៨% ក្នុងឆ្នាំ ២០២៤ និង ៦.០% ក្នុងឆ្នាំ ២០២៥ តែយ៉ាងណានេះ ប្រជាពលរដ្ឋនៅតែ​ត្អូញត្អែរទាក់ទងជីវភាពរស់នៅប្រចាំថ្ងៃ និងការថយចុះនៃចំណូល បន្ទាប់ពីកម្ពុជា និងពិភពលោក ជួបវិបត្តិសេដ្ឋកិច្ច ដោយសាររាលដាលនៃជំងឺកូវីត១៩ និងសង្រ្គាមដែលបង្កឡើងដោយប្រទេសមួយចំនួន។

លោកលើកឡើងថា ​ការវាយតម្លៃស្ថានភាពសេដ្ឋកិច្ច និងស្ថានភាពជាក់ស្តែង គឺមានភាពខុសគ្នាតិចតួចប៉ុណ្ណោះ។

លោក ផាន់ ផល្លា បានពន្យល់ថា​ការដែលរាជរដ្ឋាភិបាល ឬស្ថាប័នមួយចំនួនព្យាករណ៍ និងវាយតម្លៃថា កំណើនសេដ្ឋកិច្ចកើនឡើងក្នុងកម្រិតណាមួយ​ គឺដោយសារតែសកម្មភាពសេដ្ឋកិច្ចរបស់កម្ពុជា មានភាពល្អប្រសើរជាងមុន ដែលធ្វើឱ្យការព្យាករណ៍ទទួលបានកំណើនវិជ្ជមាន​។ ​ការព្យាករណ៍នេះ បានបង្ហាញថា វិស័យមួយចំនួន មានសកម្មភាពនៃការផលិតមានការកើនឡើង និងបង្កើតការងារបានច្រើនជាងមុន។ បើការព្យាករណ៍មិនបង្ហាញនូវកំណើនទេ បានន័យប្រជាពលរដ្ឋថ្មី គ្មានការងារធ្វើ​ គ្មានសកម្មភាពសេដ្ឋកិច្ច និងគ្មានការវិនិយោគ៕

សូមស្តាប់ការពន្យល់បន្ថែមរបស់ លោក ផាន់ ផល្លា៖