(ភ្នំពេញ)៖ ក្រុមហ៊ុន អាកាសចរណ៍ម៉ាឡេស៊ី Air Asia បានសម្រេចភ្ជាប់ជើងហោះហើរត្រង់រវាង សីហនុ-កូឡាឡាំពួ ​ឡើងវិញ បន្ទាប់ពីបានផ្អាកមួយរយៈ ដោយកត្តាទីផ្សារ។ នេះបើតាមការបញ្ជាក់របស់លោក ស៉ីន ចាន់សិរីវុត្ថា រដ្ឋលេខាធិការ និងអ្នកនាំពាក្យអាកាសចរស៊ីវិល ប្រាប់បណ្តាញព័ត៌មាន Fresh News នៅថ្ងៃទី៤ ខែកក្កដា ឆ្នាំ២០២៤នេះ។

លោក ស៉ីន ចាន់សិរីវុត្ថា បានឱ្យដឹងថា ការភ្ជាប់ជើងហោះហើរ ត្រង់រវាង សីហនុ-កូឡាឡាំពួ​ បានចាប់ពីថ្ងៃទី៣ ខែកក្កដា ឆ្នាំ២០២៤​ ដោយធ្វើការ​ហោះហើរ៣ជើង ក្នុងមួយសប្តាហ៍ ​ប្រើយន្តហោះ Airbus A320 ដែលលោកសង្ឃឹមថា តាមរយៈការហោះហើរឡើងវិញនេះ នឹងមានអ្នកដំណើរច្រើនហោះហើរតាមផ្លូវនេះ។

​ក្រុមហ៊ុនអាកាសចរណ៍​ Air Asia បានសម្រេចភ្ជាប់ជើងហោះហើរត្រង់សីហនុ-កូឡាឡាំពួ ដំបូង កាលពីឆ្នាំ​២០១៧ ប៉ុន្តែក្រោយមកបានផ្អាកការហោះហើរបណ្តោះអាសន្នវិញ និងបានសម្រេចភ្ជាប់ជើងហោះហើរឡើងវិញ នៅដើមខែកក្កដា ឆ្នាំ២០២៤នេះ។

គួរជម្រាបផងដែរ បច្ចុប្បន្ននេះ ការហោះហើរទៅកាន់ខេត្តព្រះសីហនុ មានចំនួន១៣ជើងក្នុងមួយសប្តាហ៍ (ទ្វេទិស ២៦ជើង) ក្នុងនោះក្រុមហ៊ុន Cambodia Angkor Air ហោះហើរ ៧ជើងក្នុងមួយសប្តាហ៍ក្នុងទិសដៅសីហនុ-ហូជីមិញ និងក្រុមហ៊ុន Air Asia Cambodiat ហោះហើរ ៦ជើងក្នុងមួយសប្តាហ៍ក្នុងទិសដៅទៅមកសីហនុ-សៀមរាប៕