(ភ្នំពេញ)៖ ស្របពេលនឹងការរីកចម្រើននៃបច្ចេកវិទ្យា គេកត់សម្គាល់ថា ជំនាញឌីជីថល គឺជំនាញមួយដែលកំពុងមានសក្តានុពល​ខ្ពស់នៅក្នុងទីផ្សារការងារ ពោលគឺនិស្សិតដែលបានបញ្ចប់ការសិក្សាលើជំនាញឌីជីថលស្ទើរតែ១០០% ទទួលបានការងារ និងប្រាក់ខែខ្ពស់។

បណ្ឌិត តាំង ងួនលី អគ្គនាយកនៃអគ្គនាយកដ្ឋានសេដ្ឋកិច្ចឌីជីថល ក្រសួងសេដ្ឋកិច្ច និងហិរញ្ញវត្ថុ ​កត់សម្គាល់ដែរថា និស្សិតដែលបញ្ចប់ការសិក្សាលើជំនាញឌីជីថល ហាក់មិនពិបាករកងារធ្វើនោះទេ ​ហើយពួកគេមានលទ្ធភាពទទួលបានប្រាក់ខែខ្ពស់ផងដែរ។

ដោយសំអាងទៅលើការសិក្សាស្រាវជ្រាវ របស់វិទ្យាស្ថាន CDRI និងក្រសួងប្រៃសណីយ៍ និងទូរគមនាគមន៍ ដែលបានធ្វើ​ការសិក្សារួមគ្នា កាលពីឆ្នាំ២០២២ បណ្ឌិត តាំង ងួនលី បានលើកឡើងថា រវាងនិស្សិតដែល​សិក្សា​ជំនាញឌីជីថល និងជំនាញផ្សេងទៀត ​ទើបរៀនចប់មហាវិទ្យាល័យ និងគ្មានបទពិសោធន៍ការងារដូចគ្នាឃើញថា និស្សិតដែលបញ្ចប់ការសិក្សាលើជំនាញឌីជីថល មានឱកាសទទួលបានការងារខ្ពស់ជាង ​ពោលគឺអ្នកដែលសិក្សាជំនាញឌីជីថល មានឱកាសការងារស្ទើរ​១០០% ព្រមទាំងទទួលបានប្រាក់បៀវត្សខ្ពស់ជាង អ្នកដែលមានជំនាញផ្សេងទៀត។

លោកលើកទឹកចិត្តដល់និស្សិត ដែលចាប់ជំនាញឌីជីថល ត្រូវបានខិតខំសិក្សារៀនសូត្រជំនាញនេះឱ្យគត់មត់ នោះឱកាសការងារនឹងមានច្រើននៅគ្រប់វិស័យ ទាំងវិស័យធនាគារ វិស័យធនារ៉ាប់រង ក៏ដូចជាក្នុងស្ថាប័នរដ្ឋ ដើម្បីបម្រើការងារផ្នែកឌីជីថលនៅក្នុងស្ថាប័នរបស់ខ្លួន។

បច្ចេកវិទ្យាឌីជីថលបានដើរតួនាទីយ៉ាងសំខាន់ នៅក្នុងការអភិវឌ្ឍសេដ្ឋកិច្ច សង្គម ហើយគ្រប់ស្ថាប័ន និងក្រុមហ៊ុនទាំងអស់ពិត ជាត្រូវការអ្នកជំនាញបច្ចេកវិទ្យាឌីជីថល ដើម្បីជួយសម្រួលដល់ការងារឱ្យកាន់តែមានប្រសិទ្ធភាព។ បច្ចុប្បន្ន និស្សិតដែលបានបញ្ចប់ការសិក្សាជំនាញបច្ចេកវិទ្យាឌីជីថល នៅមានចំនួនតិច ស្របពេលដែលតម្រូវការជំនាញនេះ មានកាន់តែច្រើនឡើង ដែលជាឱកាសល្អសម្រាប់ទទួលបានការងារធ្វើទាំងក្នុង និងក្រៅប្រទេស។

មិនតែប៉ុណ្ណោះ ដោយសារអ្នកជំនាញបច្ចេកវិទ្យាឌីជីថល មិនសូវមានច្រើននាំឱ្យក្រុមហ៊ុន និងស្ថាប័នមានការប្រកួតប្រជែងជ្រើសរើស យកមកបម្រើការងារ ដោយផ្តល់ប្រាក់បៀវត្សខ្ពស់ និងអត្ថប្រយោជន៍ផ្សេងៗជាច្រើន ដោយអាចប្រកបការងារជាអ្នកអភិវឌ្ឍសុសវែរ អ្នកជំនាញសន្ដិសុខសាយប័រ និងអ្នកជំនាញហេដ្ឋារចនាសម្ព័ន្ធទូរគមនាគមន៍ជាដើម។

យ៉ាងនេះក្តីនេះ បណ្ឌិត តាំង ងួនលី បានលើកឡើងថា ចំពោះអ្នកសិក្សជំនាញផ្សេងទៀត មិនមែនមានន័យថា មិនមានទីផ្សារការងារនោះទេ។ ប៉ុន្តែបើទោះបីជាពួកគេចាប់ជំនាញផ្សេង ដូចជាគ្រប់គ្រង គណនេយ្យ វិស្វករ ជាដើម គួរតែសិក្សាបន្ថែមនូវជំនាញឌីជីថលកម្រិតមូលដ្ឋាន នោះក៏មានឱកាសការងារច្រើមផងដែរ។
​
ជាមួយគ្នានេះ លោកជំរុញឱ្យ សិស្សនិស្សិត និងប្រជាពលរដ្ឋ មិនថាតែអ្នកដែលបានសិក្សាជំនាញឌីជីថល ឬជំនាញផ្សេង សូមព្យាយាមអភិវឌ្ឍន៍សមត្ថភាពខ្លួនជាបន្តបន្ទាប់ ដើម្បីងាយក្នុងការទទួលបានប្រាក់បៀវត្សខ្ពស់ និងឈានទៅចាប់បានដំណែងខ្ពស់នៅក្នុងស្ថាប័ន៕