(ភ្នំពេញ)៖ បណ្ឌិត ឆេង គឹមឡុង ប្រធានវិទ្យាស្ថានចក្ខុវិស័យអាស៊ី បានបង្ហាញពីលទ្ធផលផ្លែផ្លាជាច្រើនដែលកម្ពុជាទទួលបានពីកិច្ចសហប្រតិបត្ដិការអភិវឌ្ឍន៍តំបន់ត្រីកោណ CLV ពោលគឺកិច្ចសហប្រតិបត្តិការនេះរៀបចំឡើង ដើម្បីជាផលប្រយោជន៍ដល់ប្រជាជននៃប្រទេសទាំងបី កម្ពុជា ឡាវ និងវៀតណាម។

បណ្ឌិត ឆេង គឹមឡុង លើកឡើងបែបនេះ ធ្វើឡើង នៅក្នុងកម្មវិធី FRESH BUSINESS​ ដែលពិភាក្សាលើប្រធានបទ៖ «ការអភិវឌ្ឍទំនាក់ទំនងពាណិជ្ជកម្ម-សេដ្ឋកិច្ចរវាងកម្ពុជា វៀតណាម និងឡាវ»​ របស់បណ្តាញព័ត៌មាន Fresh News។

លោកបានពន្យល់ថា ​គោលបំណងនៃការចាប់ផ្តើមបង្កើត​កិច្ចសហប្រតិបត្តិការ​អភិវឌ្ឍតំបន់ត្រីកោណ CLV​ ដែល​ប្រមុខដឹកនាំនៃប្រទេសទាំងបី បានយល់ស្របព្រមព្រៀងគ្នាកាលពីឆ្នាំ​១៩៩៩​ គឺដើម្បីសហការគ្នាក្នុងការអភិវឌ្ឍតំបន់នោះឱ្យកាន់តែប្រសើរឡើង ដោយសារតែតំបន់នោះគឺជាតំបន់ដាច់ស្រយ៉ាល។ ហើយការអភិវឌ្ឍនេះ ​​បានតភ្ជាប់ហេដ្ឋារចនាសម្ព័ន្ធរូបវ័ន្តឱ្យមានភាពប្រទាក់ក្រឡាគ្នានៅក្នុងបណ្តាខេត្តជាប់ព្រំដែនទាំងអស់នោះ ដើម្បីជួយសម្រួលដល់ជីវភាពប្រជាជន ដល់ការធ្វើដំណើរ​ ដល់ការប្រាស្រ័យទាក់ទងគ្នា ដល់ការជំរុញពាណិជ្ជកម្មឆ្លងដែនជាដើម។ ​ម្យ៉ាងទៀត គឺជំរុញកិច្ចសហប្រតិបត្តិការផ្នែកសន្តិសុខ ព្រោះទាល់តែមានសន្តិសុខ​ សុវត្ថិភាពជូនប្រជាជន ទើបប្រជាជននៅតំបន់នោះមានការរីកចម្រើន​ និងមករស់នៅកុះករ។ លើសពីនេះទៅទៀត គឺការពង្រឹងទៅលើផ្នែកសុខភាពសាធារណៈ ​ពាណិជ្ជកម្ម និងទេសចរណ៍។

លោកបន្តថា «យើងឃើញថាកិច្ចសហប្រតិបត្តិការរវាងខេត្តជាប់ព្រំដែននៃប្រទេសទាំងបី កម្ពុជា ឡាវ វៀតណាម ក្នុងន័យធ្វើយ៉ាងណា កាត់បន្ថយនូវគម្លាតនៃការអភិវឌ្ឍន៍ពីព្រោះតំបន់នោះ គឺជាតំបន់ដែលធ្លាប់តែដាច់ស្រយ៉ាលជាងគេ ការអភិវឌ្ឍផ្នែកហេដ្ឋារចនាសម្ព័ន្ធនៅតែអន់ថយជាងគេ ដូច្នេះហើយទស្សនវិស័យរបស់ថ្នាក់ដឹកនាំ ដែលតាមពិតទៅសម្តេចតេជោ ហ៊ុន សែន គឺជាអ្នកផ្តួចផ្តើមគំនិតហើយមានការគាំទ្រពីថ្នាក់ដឹកនាំនៃប្រទេសឡាវ និងវៀតណាមសម័យនោះ ដែលបន្តនូវនិរន្តភាពដល់បច្ចុប្បន្ន ហើយខ្ញុំគិតថាគំនិតផ្តួចផ្តើមនិងកិច្ចសហប្រតិបត្តិការត្រីភាគីកម្ពុជា ឡាវ និងវៀតណាម ដើម្បីជំរុញការអភិវឌ្ឍន៍តំបន់ត្រីកោណនេះ នឹង​បន្តក្លាយទៅជាយន្តការមួយដើម្បីពង្រឹងទំនាក់ទំនងរវាងប្រជាជន និងប្រជាជន»។

លោកបានលើកឡើងថា លទ្ធផលផ្លែផ្កាដែលកើតចេញមកពីកិច្ចសហប្រតិបត្តិការ​អភិវឌ្ឍត្រីកោណ​ ​ដែលបង្ហាញជាក់ស្តែងឱ្យឃើញ គឺក្នុងសម័យកូវីដ១៩ អាជ្ញាធរដែនដីនៃបណ្តាខេត្តជាប់ព្រំដែនទាំងបីបានសហការគ្នាបានល្អជាងមុន ក្នុងការចូលរួមទប់ស្កាត់ការឆ្លងរីករាលដាលនៃជំងឺកូវីដ១៩។ ចំណែកកិច្ចសហប្រតិបត្តិការឆ្លងកាត់ព្រំដែនខុសច្បាប់​និងការរត់ពន្ធទំនិញខុសច្បាប់ ក៏ត្រូវបានពង្រឹង​ ដែលជាការចូលរួមចំណែកដល់ការការពារសុខសុវត្ថិភាពរួមគ្នា។ ជាមួយគ្នានេះ ការជំរុញនូវផលិតកម្ម ​និងការផ្លាស់ប្តូរទំនិញផ្សេងៗ និងហេដ្ឋារចនាសម្ព័នតភ្ជាប់ ដឹកជញ្ជូន និងឡូជីស្ទិក ជាមួយនឹងប្រទេសវៀតណាម និងឡាវ ​ ក៏មានការយកចិត្តទុកដាក់ខ្លាំងពីថ្នាក់ដឹកនាំខេត្តជាប់ព្រំដែន និងប្រមុខរាជរដ្ឋាភិបាល។ ​

សូមជម្រាបថា កិច្ចសហប្រតិបត្តិការអភិវឌ្ឍតំបន់ត្រីកោណរវាងកម្ពុជា ឡាវ និងវៀតណាម ត្រូវបានផ្តួចផ្តើមឡើងដោយ សម្តេចតេជោ ហ៊ុន សែន អតីតនាយករដ្ឋមន្រ្តីនៃកម្ពុជា និងបានរៀបចំកិច្ចប្រជុំកំពូលដំបូងនៅឆ្នាំ១៩៩៩ នៅទីក្រុងវៀងចន្ទន៍ប្រទេសឡាវ។ កិច្ចសហប្រតិបត្តិការនេះ មាន១៣ខេត្ត ក្នុងនោះកម្ពុជាមាន៤ខេត្ត គឺស្ទឹងត្រែង រតនគិរី មណ្ឌលគិរី និងក្រចេះ, ចំណែកឡាវមាន៤ខេត្ត វៀតណាមមាន៥ខេត្ត​។

​សម្ដេចតេជោ ហ៊ុន សែន ប្រធានព្រឹទ្ធសភាកម្ពុជា និងជាអតីតនាយករដ្ឋមន្រ្តីនៃកម្ពុជា បានពន្យល់កាលពីពេលថ្មីៗនេះថា កិច្ចសហប្រតិបត្តិការអភិវឌ្ឍតំបន់ត្រីកោណរវាងកម្ពុជា ឡាវ និងវៀតណាម គឺមិនបានទាក់ទិនជាមួយនឹងការបញ្ចូល ដែនដីជាមួយគ្នានោះទេ។ ​កិច្ចព្រមព្រៀងនេះ គឺជាកិច្ចព្រមព្រៀងដែលគិតគូរពីបញ្ហាសេដ្ឋកិច្ច សង្គម សន្តិសុខការពារជាតិ ​ហើយភាគីនីមួយៗត្រូវគ្រប់គ្រងដែនដី​និងការអភិវឌ្ឍន៍ក្នុងដែនដីរបស់ខ្លួន ដោយមានការរួមចំណែកតភ្ជាប់ជាមួយគ្នា បំពេញឱ្យគ្នាទៅវិញទៅមក ពោលគឺកិច្ចសហប្រតិបត្តិការតំបន់អភិវឌ្ឍន៍ត្រីកោណនេះ បានផ្តល់ប្រយោជន៍ផ្នែកសេដ្ឋកិច្ចទាំងភាគីកម្ពុជា ឡាវ និងវៀតណាម៕

​សូមទស្សនាការពន្យល់ន្ថែមរបស់ បណ្ឌិត ឆេង គឹមឡុង៖

p style="text-align: center;">