(ក្រុងឡុងដ៍)៖ ក្រុមបាល់ទាត់ស្រ្តីអង់គ្លេស ត្រូវបានចាប់ឆ្នោតប៉ះគូប្រជែងចាស់ ស្រ្តីអៀរឡង់ខាងជើងក្នុងវគ្គចែកពូលនៅព្រឹត្តិជើងឯកអឺរ៉ុប UEFA Euro Women Championship 2022 ដែលមានអង់គ្លេសធ្វើម្ចាស់ផ្ទះ។

ក្រៅពីប៉ះអៀរឡង់ខាងជើង ដែលពួកគេធ្លាប់យកឈ្នះ ៤-០ ម្តងហើយកាលលេងជម្រុះ World Cup 2023 នោះ ស្រ្តីអង់គ្លេសក៏ត្រូវតតាំងជាមួយស្រ្តីន័រវេស និងអូទ្រីសផងដែរពីការប្រកួតទាំងស្រុងចាប់ផ្តើមពីថ្ងៃទី០៦ ដល់ថ្ងៃទី៣១ ខែកក្កដា ឆ្នាំ២០២២ ដោយមាន ១៦ប្រទេសចូលរួម។

ក្រុមស្រ្តីអង់គ្លេស បានបញ្ចប់ក្នុងចំណាត់ថ្នាក់លេខ៤ កាលពី World Cup 2019 នៅប្រទេសបារាំង នៅពេលពួកគេបានបរាជ័យក្រោមថ្វីជើងម្ចាស់ជើងឯកស្រ្តីអាមេរិក ២-១ ក្នុងវគ្គពាក់កណ្តាលផ្តាច់ព្រ័ត្រ។

សម្រាប់ឯពូលផ្សេងទៀតរួមមាន៖

ពូល A៖ ន័រវេស អូទ្រីស អៀរឡង់ខាងជើង និងម្ចាស់ផ្ទះតោកំណាចអង់គ្លេស
ពូល B៖ អាល្លឺម៉ង់ អេស្ប៉ាញ ដាណឺម៉ាក និងហ្វាំងឡង់
ពូល C៖ ហូឡង់ ស៊ុយអែត ស្វីស និងរុស្ស៊ី
ពូល D៖ បារាំង អ៉ីតាលី ប៊ែលហ្សិក និងអ៊ីស្លង់៕