(ភ្នំពេញ)៖ ក្រុមបាល់ទាត់ជម្រើសជាតិនារីអាយុក្រោម ១៩ឆ្នាំកម្ពុជា នឹងត្រូវជួបក្រុមម្ចាស់ផ្ទះឥណ្ឌូនេស៊ី នាវេលាម៉ោង ៧៖៣០នាទីយប់នេះ ដែលជាការប្រកួតបញ្ចប់ពូល A នៃពានរង្វាន់បាល់ទាត់នារីអាយុក្រោម ១៩ឆ្នាំប្រចាំតំបន់អាស៊ីអាគ្នេយ៍ AFF U19 Women’s Championship 2023 នៅកីឡដ្ឋាន Gelora Sriwijaya ។

នេះគឺជាជំនួបកាត់សេចក្ដី រវាងក្រុមទាំងពីរ តើក្រុមណា នឹងឈរកំពូលតារាង ក៏ដូចជាឡើងទៅវគ្គពាក់កណ្ដាលផ្ដាច់ព្រ័ត្រ? បច្ចុប្បន្នទាំងពីរ មាន ៦ពិន្ទុក្នុងដៃស្មើគ្នា តែក្រុមម្ចាស់ផ្ទះ U19 នារីឥណ្ឌូនេស៊ី ឈរកំពូលតារាងបណ្ដោះអាសន្ន ព្រោះពួកគេមានប្រៀបផលសងគ្រាប់បាល់លើក្រុមបាល់ទាត់ U19 នារីកម្ពុជា ។

ដូច្នេះការប្រកួតនារាត្រីនេះ ក្រុមទទួលបានជ័យជម្នះ នឹងឡើងវគ្គពាក់កណ្ដាលផ្ដាច់ព្រ័ត្រ តែបើស្មើគ្នា កៅអីវគ្គដ៏សំខាន់នេះ នឹងធ្លាក់ទៅដៃក្រុមម្ចាស់ផ្ទះឥណ្ឌូនេស៊ី ហើយកម្ពុជា ត្រូវចាំអ៊ុតលទ្ធផលក្រុមចំណាត់ថ្នាក់លេខ២ ល្អជាងគេ ជាមួយបេក្ខភាពក្រុមលេខ២ ពូលB និងពូល C ដែលនឹងត្រូវកំណត់យក ១ក្រុមប៉ុណ្ណោះឡើងវគ្គពាក់កណ្ដាលផ្ដាច់ព្រ័ត្រ នៃពានរង្វាន់ AFF U19 Women’s Championship 2023 នេះ ៕