(ភ្នំពេញ)៖ ឯកឧត្តមកិតិ្ដនីតិកោសលបណ្ឌិត អ៉ឹម ឈុនលឹម ប្រធានក្រុមប្រឹក្សាធម្មនុញ្ញ និងភរិយា ព្រមទាំងសមាជិក សមាជិកា និងមន្ត្រីរាជការទាំងអស់នៃ អគ្គលេខាធិការដ្ឋានក្រុមប្រឹក្សាធម្មនុញ្ញ សូមសម្ដែងនូវការអបអរសាទរដ៏ក្រៃលែងថ្វាយសម្ដេចព្រះមហិស្សរា នរោត្តម ច័ក្រពង្ស់ ក្នុងឱកាសសម្តេចបានទទួលការប្រោស ព្រះរាជទានដំឡើងព្រះឋានៈជា «សម្តេចក្រុមព្រះ»។
ការទទួលបានការដំឡើងព្រះឋានៈ ដ៏ឧត្តុង្គឧត្តមនេះ គឺពិតជាស័ក្តិសមទៅនឹងព្រះគុណសម្បត្តិរបស់សម្ដេច ដែលបានលះបង់នូវព្រះកាយពល និងព្រះប្រាជ្ញាស្មារតី ក្នុងការបម្រើជាតិ សាសនា ព្រះមហាក្សត មកជាច្រើនទសវត្សរ៍ តាំងពីរជ្ជកាលនៃព្រះករុណាព្រះបរមរតនកោដ្ឋ រហូតដល់រជ្ជកាល នៃព្រះករុណាជា អម្ចាស់ជីវិតលើត្បូង ព្រះករុណា ព្រះបាទ សម្តេចព្រះបរមនាថ នរោត្តម សីហមុនី។
ក្នុងឱកាសប្រកបដោយនក្ខត្តឫក្សនេះ ទូលបង្គំសូមបួងសួងដល់គុណបុណ្យព្រះរតនត្រៃ និងទសបារមី នៃវត្ថុស័ក្ដិសិទ្ធិទាំងអស់ក្នុងលោក សូមប្រោសប្រទានសព្ទសាធុការពរជ័យ សិរីមង្គល វិបុលសុខគ្រប់ប្រការ ថ្វាយសម្តេចក្រុមព្រះ និងអ្នកម្នាង ព្រមទាំងព្រះញាតិវង្ស សូមបានប្រកបដោយព្រះពុទ្ធពរទាំងបួនប្រការ កុំបីឃ្លៀងឃ្លាតឡើយ៕
