(យ៉ាអួនដេ)៖ កីឡាករចាំទីកាមេរូន Andre Onana បានប្រកាសចូលនិវត្តន៍ពីជម្រើសជាតិ មានរយៈពេល ១ខែបន្ទាប់ពីមានបញ្ហាជាមួយនឹងគ្រូបង្វឹក Rigobert Song នៃព្រឹត្តិការណ៍ World Cup នៅកាតា។ នេះបើយោងតាមសារព័ត៌មាន CNA ចេញផ្សាយនាថ្ងៃទី២៤ ខែធ្នូ ឆ្នាំ២០២២។

អ្នកចាំទីរបស់ក្លិប Inter Milan វ័យ ២៦ឆ្នាំរូបនេះ មិនបានផ្តល់ហេតុផលជាក់លាក់ អំពីការសម្រេចចិត្តរបស់លោកនោះទេ ដោយគ្រាន់តែលើកឡើងថា «រឿងរបស់លោកជាមួយនឹងក្រុមជម្រើសជាតិកាមេរូនបានដើរដល់ទីបញ្ចប់ហើយ»។

Onana លេងចូលប្រកួតបើកឆាក World Cup នៃក្រុមរបស់លោក ក្នុងលទ្ធផលចាញ់ ១-០ ក្រោមថ្វីជើងក្រុមស្វីសនៅកាតា ប៉ុន្តែត្រូវបានដកចេញ ក្នុងការប្រកួត ២បន្ទាប់ បន្ទាប់ពីមានសេចក្តីរាយការណ៍ថា មិនយល់ព្រមជាមួយនឹងលោក Song ស្តីពីយុទ្ធសាស្ត្រនៃការប្រកួត។

សហព័ន្ធបាល់ទាត់កាមេរូន (FECAFOOT) បានលើកឡើងនៅពេលនោះថា Onana ត្រូវបានបញ្ឈរជើង «ដោយសារហេតុផលវិន័យ»។

Onana បានចូលលេង ៣៤លើកឲ្យក្រុមជម្រើសជាតិ បន្ទាប់ពីបង្ហាញខ្លួនលើកដំបូងក្នុងឆ្នាំ២០១៦ មក៕