(អាមេរិក)៖ លោក Charles Calvino Hang ដែលជាកូនកាត់ខ្មែរអាមេរិកនោះ នាពេលថ្មីៗនះបាននាំយកមុខម្ហូបហហ្មុកត្រី ជាមុខម្ហូបរបស់ខ្មែរឲ្យពិភពលោកបានស្គាល់កាន់តែច្បាស់ តាមរយៈកម្មវិធីដ៏ល្បី ដែលធ្វើឡើងនៅអាមេរិក គឺ «MasterChef United Tasted of America»។ បន្ទាប់ពីធ្វើឲ្យគណៈកម្មការទាំង៤នាក់ ពេញចិត្តនឹងហហ្មុកមួយចានរបស់លោក ដោយសរសើរមិនដាច់ពីមាត់​ និងត្រូវបានទស្សនិកជនខ្មែរសាទរជាច្រើន នៅពេលនេះ​លោកបានក្លាយជា បេក្ខជន​​ខ្មែរ​-អាមេរិក ដំបូង​គេជាផ្លូវការហើយ ឈានដល់វគ្គ Top 20 នៃកម្មវិធីនេះ និងត្រៀមប្រកួតវគ្គបន្ត។

តាមរយៈបណ្តាញសង្គមរបស់លោក Charles Calvino Hang បានសរសេរសារបន្ថែមពីការប្រកួតរបស់លោក ដោយលើកឡើងថា «ផ្លូវការហើយ! សូមជំរាបសួរ កូនកាត់ខ្មែរអាមេរិកដំបូងបង្អស់ ដែលបានឡើងទៅកាន់វគ្គ Top20 នៃកម្មវិធី Masterchef នៅអាមេរិក សម្រាប់រដូវកាលទី១៣។ សូមរង់ចាំទស្សនាបន្តទៀត នៅលើកញ្ចក់ទូរទស្សន៍ FoxTV»។

នៅក្នុងកម្មវិធី Masterchef United Tasted of America លោក Charles Calvino Hang បានលើកយកមុខម្ហូប «ហហ្មុក» ដែលជាមុខម្ហូបតំណាងប្រទេសកម្ពុជា មានគ្រឿងផ្សំធ្វើពីត្រី ឬត្រីអណ្តែងស្រស់ផ្សំគ្រឿងមានការពិបុក និងខ្ទិះដូង និងខ្ចប់ចំហុយ។ មុខម្ហូប «ហហ្មុក» ដែលលោក Charles លើកមកបង្ហាញ បានទទួលការសរសើរមិនដាច់ពីមាត់ ពីគណៈកម្មការទាំងបួន ដែលធ្វើឲ្យលោកទទួលបាន YES ដល់ទៅ៤ ដើម្បីឈានទៅប្រកួតវគ្គបន្ទាប់។

គួរជម្រាបថា លោក Charles Calvino Hang មានអាយុ ៣៤ឆ្នាំ មានមុខរបរជាជាងកាត់សក់។ បច្ចុប្បបន្នលោករស់នៅរដ្ឋ Ohio សហរដ្ឋអាមេរិក ហើយការចូលរួមប្រកួតធ្វើម្ហូបក្នុងកម្មវិធី Masterchef US ក៏ព្រោះការធ្វើម្ហូប គឺជាអ្វីដែលលោកចូលចិត្តធ្វើ ហើយលោកក៏មានបំណងបង្ហាញពីវប្បធម៌គ្រួសារ និងប្រទេសកម្ពុជា តាមរយៈការចូលរួមប្រកួត នៅកម្មវិធីដ៏ល្បីនេះផងដែរ៕