(បរទេស)៖ ក្រុមហ៊ុន Apple បានប្រកាសថាការធ្វើឱ្យប្រសើរឡើងនូវបញ្ញាសិប្បនិម្មិត្ត AI មួយចំនួនដល់ជំនួយការសំឡេងរបស់ខ្លួន Siri នឹងត្រូវពន្យារពេលរហូតដល់ឆ្នាំ២០២៦។ ជុំវិញមូលហេតុពន្យាពេលនេះមិនត្រូវបាន Apple បញ្ជាក់នោះទេ ខណៈក្រុមហ៊ុនខ្នាតយក្សនេះបានចង្អុលបង្ហាញថា លក្ខណៈពិសេសនេះដំបូងឡើយគ្រោងនឹងមកដល់នៅឆ្នាំ២០២៥។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី០៨ ខែមីនា ឆ្នាំ២០២៥។
នៅក្នុងសេចក្តីថ្លែងការណ៍មួយ ក្រុមហ៊ុន Apple បាននិយាយថា ខ្លួនបាននឹងកំពុងធ្វើការលើ Siri ផ្ទាល់ខ្លួនបន្ថែមទៀត ដែលមានបំណងបង្កើនការយល់ដឹងរបស់ជំនួយការសំឡេងអំពីបរិបទអ្នកប្រើប្រាស់ និងសមត្ថភាពរបស់វាក្នុងការអនុវត្តការងារលើកម្មវិធីផ្សេងៗ។ Apple ទទួលស្គាល់ថាវានឹងចំណាយពេលយូរជាងការរំពឹងទុក ប៉ុន្តែសមត្ថភាពពិសេសនេះនឹងព្យាយាមដាក់ឱ្យប្រើប្រាស់នៅឆ្នាំខាងមុខនេះ។
កាលពីឆ្នាំមុន Apple បានប្រកាសពីមុខងារ AI-driven ជាច្រើនដែលហៅថា Apple Intelligence ដែលរួមបញ្ចូលនូវសមត្ថភាពថ្មីដូចជាការសរសេរអ៊ីមែលឡើងវិញ និងការសង្ខេបសារ។ យោងតាមរបាយការណ៍ចុះផ្សាយចុងក្រោយនេះបានបង្ហាញថា ក្រុមហ៊ុន Apple កំពុងសាងសង់ហេដ្ឋារចនាសម្ព័ន្ធ cloud computing ថ្មីដ៏ធំដែលដំណើរការលើបន្ទះឈីបផ្ទាល់ខ្លួន ដើម្បីរក្សាជំហរឯកជនភាពរបស់ខ្លួន ខណៈពេលដែលផ្តល់នូវលក្ខណៈពិសេស AI។ Apple បញ្ជាក់ថា សមត្ថភាពពិសេសនេះ នឹងអនុញ្ញាតឱ្យ Siri អាចគាំទ្រអ្នកប្រើប្រាស់ដល់ទៅ ១.៥ពាន់លាននាក់ក្នុងមួយថ្ងៃ។
គួរជម្រាបថា គូប្រជែងរបស់ Apple បច្ចុប្បន្ននេះក៏កំពុងប្រញាប់ប្រញាល់បន្ថែមមុខងារ AI ទៅកាន់ជំនួយការសំឡេងរបស់ពួកគេផងដែរ ដោយក្នុងនោះគេមើលឃើញថាក្រុមហ៊ុន Alphabet បានបន្ថែមលក្ខណៈពិសេសនៅក្នុង Gemini ចូលទៅក្នុង Google។ ដោយឡែកចំពោះ Amazon បានបន្ថែមលក្ខណៈពិសេសចូលទៅក្នុងជំនួយការ Alexa របស់ខ្លួន៕
