(បរទេស)៖ ក្រុមហ៊ុនបច្ចេកវិទ្យាយក្ស Apple បានបញ្ជាក់ថា សន្និសីទអ្នកអភិវឌ្ឍន៍ទូទាំងពិភពលោក (WWDC) របស់ខ្លួនសម្រាប់ឆ្នាំ២០២៥ នឹងប្រព្រឹត្តទៅចាប់ពីថ្ងៃទី០៩ ខែមិថុនា ដល់ថ្ងៃទី១៣ ខែមិថុនាខាងមុខនេះ។ ព្រឹត្តិការណ៍នេះ នឹងធ្វើឡើងតាមអ៊ីនធឺណិតទាំងស្រុង ហើយមិនមានការគិតថ្លៃសម្រាប់ developer ទាំងអស់ ដោយអនុញ្ញាតឱ្យពួកគេចូលប្រើវគ្គវីដេអូ និងបន្ទប់ពិសោធន៍និម្មិតតាមរយៈកម្មវិធី Apple Developer, website និង​ YouTube channel ថែមទៀតផង។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃទី២៦ ខែមីនា ឆ្នាំ២០២៥។

Apple បានឱ្យដឹងទៀតថា ព្រឹត្តិការណ៍នេះ នឹងបង្ហាញពីការធ្វើបច្ចុប្បន្នភាពកម្មវិធីពិសេសៗដែលដំណើរការនៅលើ iPhone, iPad និង ឧបករណ៍របស់ខ្លួនដទៃទៀត។ ដោយឡែក នឹងមាន developer និងសិស្សមួយចំនួននឹងត្រូវបានអញ្ជើញឱ្យចូលរួមដោយផ្ទាល់នៅ Apple Park នៅថ្ងៃបើក។

បើក្រឡេកទៅក្នុងសន្និសីទកាលពីឆ្នាំមុន ក្រុមហ៊ុន Apple បានបង្ហាញនូវមុខងារ AI-enabled ជាច្រើន ដែលរួមបញ្ចូលនូវសមត្ថភាពថ្មីៗ ដូចជាការសរសេរអ៊ីមែលឡើងវិញ និងការសង្ខេបប្រអប់សំបុត្រដែលមានភាពស្មុគ្រស្មាញ។ យ៉ាងណា ក្នុងសន្និសិទក្នុងឆ្នាំនេះត្រូវបានគេរំពឹងថានឹងផ្តោតលើការបង្កើតបទពិសោធន៍ដែលរួបរួមបន្ថែមទៀតនៅទូទាំងវេទិការបស់ Apple ជាមួយនឹងការធ្វើបច្ចុប្បន្នភាពចំពោះ Siri និង Apple Intelligence។

គួរជម្រាបថា សម្រាប់អ្នកគាំទ្រ Apple ទំាងអស់ដែលចង់ដឹងព័ត៌មានបន្ថែមអំពីសន្និសីទនេះអាចធ្វើការតាមដានបានតាមរយៈកម្មវិធី Apple Developer និងគេហទំព័រ WWDC25។​ WWDC គឺជាព្រឹត្តិការណ៍ដ៏សំខាន់មួយសម្រាប់អ្នកអភិវឌ្ឍន៍ (developer) និងអ្នកចូលចិត្តបច្ចេកវិទ្យាដូចគ្នា ដោយផ្តល់ការយល់ដឹងអំពីបច្ចេកវិទ្យាចុងក្រោយបំផុតរបស់ Apple និងផែនការអនាគត៕