(មែលប៊ន)៖ អាជ្ញាធររដ្ឋ Victoria នៃប្រទេសអូស្រ្តាលីនៅថ្ងៃអាទិត្យនេះ បានឲ្យដឹងថា វិធានការរឹតត្បិតសំដៅទប់ស្កាត់ការឆ្លងរាលដាលនៃ COVID-19 នៅរដ្ឋ Victoria នឹងត្រូវបន្ធូរបន្ថយដោយសន្សឹមៗជាទីបំផុត បើទោះបីជាអត្រាអ្នកឆ្លងប្រចាំថ្ងៃមានការថយចុះក៏ដោយ។ នេះបើតាមការចេញផ្សាយដោយទីភ្នាក់ងារព័ត៌មាន Reuters នៅថ្ងៃអាទិត្យ ទី១៣ ខែកញ្ញា ឆ្នាំ២០២០។

ទន្ទឹមជាមួយការប្រកាសពីកញ្ចប់ហិរញ្ញវត្ថុទំហំ២.២ពាន់លានដុល្លារអាមេរិក ដើម្បីជួយដល់អាជីវកម្មនានាក្នុងរដ្ឋ Victoria ដែលជារដ្ឋមានប្រជាជនរស់នៅច្រើនបំផុតលំដាប់ទី២ របស់ប្រទេសអូស្រ្តាលី អាជ្ញាធររដ្ឋ Victoria ក៏បានឲ្យដឹងផងដែរថា មានករណីឆ្លង COVID-19 ថ្មីៗ ៤១ករណីទៀត និងករណីស្លាប់ថ្មី៧ករណី។

អត្រាករណីឆ្លងខាងលើ ស្តែងឲ្យឃើញពីការបន្តថយចុះនៃចំនួនករណីឆ្លងថ្មីៗ នៅក្នុងរដ្ឋ Victoria បើធៀបនឹងដើមខែសីហា ដែលជាពេលចាប់ផ្តើមនៃការឆ្លងរាលដាលរលកទីពីរនោះ គឺមានការរកឃើញអ្នកឆ្លងដល់ទៅជាង ៧០០ករណីក្នុងមួយថ្ងៃ។ អាជ្ញាធររដ្ឋ Victoria បាន បញ្ជាក់ថា ទោះអត្រាអ្នកឆ្លងបន្តថយចុះក៏ដោយ ការដកវិធានការរឹតត្បិតទាំងស្រុងវិញតែម្តង មិនអាចប្រព្រឹត្តទៅបានឡើយ គឺមានតែធ្វើឡើងដោយសន្សឹមៗបែបនេះ។

គួរជម្រាបថា ក្នុងចំណោមករណីឆ្លងសរុបជាង ២៦,៦០០នាក់នៅទូទាំងប្រទេសអូស្រ្តាលី ប្រមាណ៧៥ភាគរយគឺនៅរដ្ឋ Victoria ផ្ទាល់។ ទីក្រុងមែលប៊នរបស់រដ្ឋ Victoria បានស្ថិតក្រោមវិធានការរឹតត្បិតយ៉ាងតឹងរ៉ឹងអស់រយៈពេលជាច្រើនសប្តាហ៍មកហើយ នៅដើមសប្តាហ៍ក្រោយនេះ នឹងមានការបន្ធូរបន្ថយបន្តិចបន្តួច ដោយប្រជាជនអាចស្ថិតនៅក្រៅផ្ទះបានយូរជាងមុន ហើយបម្រាមគោចរពេលយប់នឹងត្រូវបន្ថយម៉ោងខ្លះ៕