(ម៉ូស្គូ)៖ អ្នកនាំពាក្យប្រចាំតំបន់គ្មានការប្រយុទ្ធគ្នា (de-escalation zone) នៃប្រទេសស៊ីរីបានថ្លែងប្រាប់ក្រុមអ្នកសារព័ត៌មានថា កងទ័ពរុស្ស៊ី និងតួកគីបានធ្វើសមយុទ្ធរួមគ្នាមួយ​នៅខេត្តអ៉ីដលីប (Idlib) របស់ប្រទេសស៊ីរី។ នេះបើតាមការចេញផ្សាយ ដោយសារព័ត៌មាន Sputnik នារសៀលថ្ងៃចន្ទ ទី២១ ខែកញ្ញា ឆ្នាំ២០២០។

យោងតាមអ្នកនាំពាក្យដដែលបានឲ្យដឹងទៀតថា គោលបំណងសំខាន់នៃសមយុទ្ធយោធានេះ គឺជាការអនុវត្តតាមកិច្ចសម្របសម្រួលរវាងកងទ័ពតួកគី និងរុស្ស៊ី ដើម្បីដោះស្រាយបញ្ហារួមគ្នាក្នុងស្ថានភាពបន្ទាន់ ដូចជាការវាយប្រហារលើក្បួនរថយន្តភាគីទាំងពីរ ពីសំណាក់ក្រុមសកម្មប្រយុទ្ធ ព្រមទាំងដើម្បីពង្រឹងយុទ្ធសាស្រ្តក្នុងការល្បាត និងវិធីសាស្ត្រធ្វើទំនាក់ទំនងគ្នា​ដោយប្រើសញ្ញាពិសេសជាដើម។

កាលពីថ្ងៃព្រហស្បតិ៍សប្តាហ៍មុន ប្រភពចេញពីប្រទេសតួកគីបានប្រាប់សារព័ត៌មាន Sputnik ថា ការចរចារវាងយោធាតួកគី និងរុស្ស៊ីស្តីពីស្ថានការណ៍នៅខេត្ត Idlib របស់ប្រទេសស៊ីរី មិនបានឈានដល់កិច្ចព្រមព្រៀងណាមួយឡើយ។ តាមប្រភពដដែលបានឲ្យដឹងទៀតថា ប្រទេសតួកគីបានបដិសេធ មិនដកប៉ុស្តិ៍ត្រួតពិនិត្យចេញពីតំបន់ ដែលកំពុងគ្រប់គ្រងដោយកងទ័ពស៊ីរី ឬកាត់បន្ថយចំនួនកងទ័ពតួកគីនៅក្នុងតំបន់នោះឡើយ បើទោះបីជាប្រជាជននៅក្នុងខេត្ត Idlib បានធ្វើបាតុកម្មប្រឆាំងនឹងវត្តមានរបស់យោធាតួកគីក៏ដោយ។

គួរបញ្ជាក់ថា គិតត្រឹមថ្ងៃចន្ទនេះខេត្ត Idlib ជាតំបន់មួយក្នុងចំណោមតំបន់ឈប់បាញ់គ្នាទាំង ០៤ ដែលត្រូវបានបង្កើតឡើងដោយប្រទេសរុស្ស៊ី អ៉ីរ៉ង់ និងតួកគីតាំងពីឆ្នាំ២០១៧ នោះ នៅតែតំបន់ដែលមិនទាន់ស្ថិតក្រោមការគ្រប់គ្រងពេញលេញ ដោយរដ្ឋាភិបាលទីក្រុងដាម៉ាស (Damascus) នៅឡើយ ហើយកងទ័ពរដ្ឋាភិបាលស៊ីរីបានព្យាយាមដណ្តើមយកខេត្តនេះ ចាប់តាំងពីពាក់កណ្តាលខែធ្នូ ឆ្នាំ២០១៩ មកម្ល៉េះ៕