(វ៉ាស៊ីនតោន)៖ ធនាគារពិភពលោក (World Bank) បានប្រកាសនៅថ្ងៃអង្គារសប្ដាហ៍នេះថា ខ្លួនបានស្នើសុំក្រុមប្រឹក្សានាយក អនុម័តកញ្ចប់ថវិកា «១២ពាន់លានដុល្លារអាមេរិក» ដើម្បីជួយប្រទេសក្រីក្រក្នុងការបញ្ជាទិញ និងចែកចាយវ៉ាក់សាំង COVID-19។ នេះបើតាមការចេញផ្សាយ​ដោយសារព័ត៌មាន CNA នៅរសៀលថ្ងៃពុធ ទី៣០ ខែកញ្ញា ឆ្នាំ២០២០។

ធនាគារបានអនុវត្តកម្មវិធីឆ្លើយតបបន្ទាន់ នៅក្នុងប្រទេសចំនួន ១១១ រួចមកហើយ ដោយថវិកានោះនឹងត្រូវបានអនុម័ត សម្រាប់តែប្រទេសដែលមានប្រាក់ចំណូលទាប និងមធ្យមតែប៉ុណ្ណោះ។ អ្នកនាំពាក្យធនាគារពិភពលោក បានគូសបញ្ជាក់យ៉ាងដូច្នេះថា «វ៉ាក់សាំង COVID-19 ដែលមានប្រសិទ្ធភាព និងសុវត្ថិភាព គឺជាភាពជោគជ័យមួយដែលពិភពលោកទាំងមូល អាចឆ្ពោះទៅកាន់ការបើកដំណើរការឡើងវិញដោយប្រក្រតី និងសុវត្ថិភាព។ ប៉ុន្តែសេដ្ឋកិច្ចពិភពលោក នឹងមិនងើបឡើងវិញពេញលេញនោះទេ រហូតដល់មនុស្សមានអារម្មណ៍ថា ពួកគេអាចរស់នៅបាន ដោយមានការទំនាក់ទំនងក្នុងសង្គម ក៏ដូចជាការធ្វើការ និងការធ្វើដំណើរវិញបានដោយភាពជឿជាក់»។

យ៉ាងណាមិញ វ៉ាក់សាំង COVID-19 មិនទាន់មានការលក់ជាលក្ខណៈពាណិជ្ជកម្មនៅឡើយទេ ប៉ុន្តែអគ្គនាយកធនាគារពិភពលោក លោក ដេវីដ ម៉ាល់ប៉ាស់ (David Malpass) បានប្រាប់កាសែតបារាំង Le Figaro ថា «ដំណើរការនៃការចែកចាយវ៉ាក់សាំង គឺពិតជាស្មុគស្មាញណាស់ ប៉ុន្តែវាពិតជាមានសារៈសំខាន់ណាស់ ដែលយើងទាំងអស់គ្នាគួរតែចូលរួមជាមួយវា»។ លោក David ក៏បានមានប្រសាសន៍បន្ថែមថា «យើងចង់ឲ្យប្រទេសក្រីក្របំផុត មានលទ្ធភាពប្រើប្រាស់វ៉ាក់សាំង COVID-19 នេះ ហើយក្នុងចំណោមប្រទេសទាំងនោះ យើងចង់ឲ្យប្រជាជនដែលងាយរងគ្រោះបំផុត និងបុគ្គលិកសុខាភិបាល ត្រូវទទួលបានវ៉ាក់សាំងនេះផងដែរ»។

គួររំលឹកថា ធនាគារពិភពលោក ក៏បានបញ្ចេញកញ្ចប់ថវិកាជំនួយចំនួន ៤៥ពាន់លានដុល្លារផងដែរ កាលពីចន្លោះខែមេសា និងមិថុនា ខណៈដែលសេដ្ឋកិច្ចពិភពលោក បាននិងកំពុងចុះខ្សោយយ៉ាងខ្លាំង ចំពេលដែលមានការឆ្លងរីករាលដាលនៃ COVID-19 នេះ៕