(ម៉ូស្គូ)៖ ក្រសួងសុខាភិបាលរុស្ស៊ីនៅថ្ងៃចន្ទសប្តាហ៍នេះ បានប្រកាសឱ្យដឹងថា វ៉ាក់សាំង Sputnik V មានប្រសិទ្ធភាពជាង ៩០% ប្រឆាំងនឹងជំងឺ COVID-19។ នេះបើតាមការចេញផ្សាយ ដោយសារព័ត៌មាន CNA នៅព្រឹកថ្ងៃអង្គារ ទី១០ ខែវិច្ឆិកា ឆ្នាំ២០២០។

ការលើកឡើងនេះត្រូវបានធ្វើឡើង បន្ទាប់ពីសេចក្តីប្រកាសមួយរបស់ក្រុមហ៊ុន ភីហ្វីហ្សឺ (Pfizer) និង បាយអូអិនធិច (BioNTech) របស់ប្រទេសអាល្លឺម៉ង់ កាលពីថ្ងៃចន្ទម្សិលមិញថា វ៉ាក់សាំងដំបូងរបស់ពួកគេ អាចការពារមនុស្សកុំឲ្យឆ្លងជំងឺរាតត្បាតសកល COVID-19 បានរហូតដល់ជាង ៩០%។

លោក អូកសាណា ដ្រាបឃីណា (Oksana Drapkina) ប្រធានវិទ្យាស្ថានស្រាវជ្រាវមួយ ស្ថិតក្រោមការគ្រប់គ្រង របស់ក្រសួងសុខាភិបាលរុស្ស៊ីបានគូសបញ្ជាក់ថា «យើងទទួលខុសត្រូវក្នុងការតាមដាន ប្រសិទ្ធភាពនៃវ៉ាក់សាំង Sputnik V ក្នុងចំណោមពលរដ្ឋដែលទទួលវាដំបូងៗ ដែលជាផ្នែកមួយនៃកម្មវិធីចាក់វ៉ាក់សាំងដ៏ធំរបស់ប្រទេសរុស្ស៊ី ដោយលទ្ធផលបានបង្ហាញថា មិនមានអ្វីជាការព្រួយបារម្ភ ចំពោះសុវត្ថិភាពរបស់វាឡើយ»។

គួរជម្រាបថា ប្រទេសរុស្ស៊ីបានរាយការណ៍ពីករណីឆ្លងជំងឺ COVID-19 ថ្មីៗរហូតដល់ ២១,៧៩៨ករណីកាលពីថ្ងៃចន្ទ ប្រការនេះហើយទើបអាជ្ញាធរបានអំពាវនាវ ឱ្យមានវិធានការណ៍តឹងរ៉ឹងជាងនេះ ដើម្បីទប់ស្កាត់ការឆ្លង និងរីករាលដាល នៃវីរុសដ៏កាចសាហាវមួយនេះ នៅតាមតំបន់ធំៗមួយចំនួន។ រហូតមកទល់ពេលនេះ ប្រទេសរុស្ស៊ីបានកត់ត្រានូវករណីឆ្លងជំងឺ COVID-19 ប្រហែលជា ១.៨លានករណីក្នុងនោះមនុស្ស ៣០,៧៩៣នាក់បានស្លាប់ និងមនុស្សច្រើនជាង ១.៣លាននាក់បានជាសះស្បើយឡើងវិញ៕