(បាងកក)៖ នៅថ្ងៃអង្គារ ទី០៦ ខែមេសា ឆ្នាំ២០២១នេះ អាជ្ញាធរគ្រប់គ្រងស្ថានការណ៍ COVID-19 នៅក្នុងប្រទេសថៃ បានប្រកាសពីការរកឃើញអ្នកឆ្លងជំងឺនេះ ២៥០នាក់ថ្មីទៀតដោយក្នុងនោះ ២៤៥នាក់ជាករណីឆ្លងក្នុងស្រុក និង ០៥នាក់ទៀតជាករណីនាំចូល។ នេះបើតាមការចេញផ្សាយ ដោយសារព័ត៌មានថៃ Bangkok Post។

នៅក្នុងរបាយការណ៍ប្រចាំថ្ងៃខាងលើនេះបានបញ្ជាក់ថា ក្នុងចំណោមករណីឆ្លង COVID-19 ក្នុងស្រុកទាំង ២៤៥ករណីនោះ គឺ ១៥៦នាក់់ត្រូវបានរកឃើញ នៅទីក្រុងបាងកក, ៣០នាក់ខេត្តណារ៉ាត់ធីវ៉ាត់, ២០នាក់នៅខេត្តសាមុតប្រាកាន, ១៨នាក់នៅឈុនបុរី, ០៧នាក់នៅខេត្តសាមុតសាខន និងខេត្តមួយចំនួនទៀត ត្រូវបានរកឃើញក្នុងចំនួនតិចតួច។

គួរបញ្ជាក់ថា គិតត្រឹមថ្ងៃអង្គារនេះថៃមានករណីឆ្លង COVID-19 សរុប ២៩,៥៧១ករណី ក្នុងនោះមានអ្នកស្លាប់ ៩៥នាក់ និងជាសះស្បើយឡើងវិញ ២៧,៩៤៨នាក់ (ស្មើនឹង ៩៤.៥១%)។ ករណីឆ្លងថ្មីៗដែលត្រូវបានប្រកាសនៅថ្ងៃនេះ គឺជាការកើនឡើងកម្រិតខ្ពស់ថ្មីមួយទៀត លើសកាលពីថ្ងៃចន្ទម្សិលមិញ ដែលមានឆ្លង COVID-19 ជិត ២០០ករណី ក្រោយការផ្ទុះករណីឆ្លងយ៉ាងច្រើន ក្នុងពន្ធនាគារមួយនៃខេត្តណារ៉ាត់ធីវ៉ាត់ ភាគខាងត្បូងប្រទេសថៃ៕