(មូស្គូ)៖ ប្រធានាធិបតីរុស្ស៊ី លោក វ្ល៉ាឌីមៀ ពូទីន បាននិយាយកាលពីល្ងាចថ្ងៃពុធថា រុស្ស៊ីមិនមានការរចនាក្នុងការវាយប្រហារ លើរដ្ឋសមាជិកណាតូណាមួយឡើយ ប៉ុន្តែប្រសិនបើប្រទេសលោកខាងលិចផ្គត់ផ្គង់ដល់អ៊ុយក្រែន នូវយន្តហោះចម្បាំង F-16 នោះ កងកម្លាំងរុស្ស៊ីនឹងបាញ់ទម្លាក់ពួកគេដោយមិនគិតទីតាំងឡើយ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី២៨ ខែមីនា ឆ្នាំ២០២៤។
ការឈ្លានពានរបស់រុស្ស៊ីលើអ៊ុយក្រែនក្នុងខែកុម្ភៈឆ្នាំ២០២២ បានបង្កឱ្យមានវិបត្តិដ៏ជ្រៅបំផុតនៅក្នុងទំនាក់ទំនងរបស់រុស្ស៊ី ជាមួយលោកខាងលិចចាប់តាំងពីវិបត្តិមីស៊ីលគុយបាឆ្នាំ ១៩៦២។
លោក ពូទីន បានប្រាប់អ្នកបើកយន្តហោះរបស់កងទ័ពអាកាសរុស្ស៊ីថា សម្ព័ន្ធមិត្តយោធាដឹកនាំដោយសហរដ្ឋអាមេរិក បានពង្រីកឆ្ពោះទៅទិសខាងកើត មកកាន់ប្រទេសរុស្ស៊ី ចាប់តាំងពីការដួលរលំនៃសហភាពសូវៀតក្នុងឆ្នាំ ១៩៩១ ប៉ុន្តែទីក្រុងមូស្គូមិនមានគម្រោងវាយប្រហាររដ្ឋសមាជិកណាតូនោះទេ។
វិមានក្រឹមឡាំង ដែលបានចោទប្រកាន់សហរដ្ឋអាមេរិកថា ប្រយុទ្ធប្រឆាំងនឹងរុស្ស៊ីតាមរយៈការគាំទ្រអ៊ុយក្រែន ទាំងថវិកា សព្វាវុធ និងផ្នែកចារកម្ម បាននិយាយថា ទំនាក់ទំនងជាមួយក្រុងវ៉ាស៊ីនតោន ប្រហែលជាមិនអាក្រក់ជាងនេះទេ។
ជាការឆ្លើយតបទៅនឹងសំណួរអំពីយន្តហោះចម្បាំង F-16 ដែលលោកខាងលិចបានសន្យាថា នឹងបញ្ជូនទៅឱ្យអ៊ុយក្រែន លោក ពូទីន បាននិយាយថា យន្តហោះទាំងនោះនឹងមិនផ្លាស់ប្តូរស្ថានភាពនៅអ៊ុយក្រែនឡើយ។
លោក ពូទីន បាននិយាយដូច្នេះថា «ប្រសិនបើពួកគេផ្គត់ផ្គង់យន្តហោះ F-16...នោះនឹងមានមិនផ្លាស់ប្តូរស្ថានភាពនៅលើសមរភូមិទេ»។ លោកបានបន្ថែមថា «យើងនឹងបំផ្លាញយន្តហោះទាំងនេះ ដូចដែលយើងធ្លាប់បានបំផ្លាញរថក្រោះ និងឧបករណ៍ផ្សេងទៀត រួមទាំងឧបករណ៍បាញ់គ្រាប់រ៉ុក្កែតជាច្រើនផងដែរ»។
ប្រធានាធិបតីរុស្ស៉ីរូបនេះ បានសង្កត់ធ្ងន់ទៀតថា «យន្តហោះ F-16 ក៏អាចផ្ទុកអាវុធនុយក្លេអ៊ែរផងដែរ។ ហើយជាការពិត ប្រសិនបើពួកវាត្រូវបានប្រើប្រាស់ពីអាកាសយានដ្ឋានក្នុងប្រទេសទីបី នោះពួកវាក្លាយជាគោលដៅស្របច្បាប់សម្រាប់យើង ដោយមិនគិតពីកន្លែងដែលពួកគេស្ថិតនៅទេ»។
គួរជម្រាបថា ការអត្ថាធិប្បាយរបស់ លោក ពូទីន នេះបានធ្វើឡើង បន្ទាប់ពីរដ្ឋមន្ត្រីការបរទេសអ៊ុយក្រែន លោក Dmytro Kuleba បាននិយាយនៅមុនថ្ងៃនេះថា យន្តហោះ F-16 គួរតែទៅដល់អ៊ុយក្រែនក្នុងរយៈពេលប៉ុន្មានខែខាងមុខនេះ។ អ៊ុយក្រែនដែលមានសង្គ្រាមជាមួយរុស្ស៊ីអស់រយៈពេលជាងពីរឆ្នាំមកហើយនោះ បានស្វែងរកយន្តហោះ F-16 ជាច្រើនខែ។
ប្រទេសមួយចំនួនដូចជា បែលហ្សិក ដាណឺម៉ាក ន័រវេស និងហូឡង់ បានសន្យាបរិច្ចាគយន្តហោះ F-16 ដល់អ៊ុយក្រែន។ ហើយបណ្តាប្រទេសជាសម្ព័ន្ធផ្សេងទៀត ក៏បានសន្យាថា នឹងជួយបណ្តុះបណ្តាលអ្នកបើកយន្តហោះអ៊ុយក្រែន ក្នុងការប្រើប្រាស់របស់យន្តងហោះទាំងនោះផងដែរ៕
