(Miami សហរដ្ឋអាមេរិក)៖​ បុរសម្នាក់មកពីរដ្ឋ Florida សហរដ្ឋអាមេរិក ត្រូវបានចាប់ខ្លួន សម្រាប់ការគំរាមកំហែងប្រឆាំងនឹងលោកប្រធានាធិបតី ចូ បៃដិន តែប៉ុន្មានថ្ងៃ ប៉ុណ្ណោះបន្ទាប់ពីអតីតប្រធានាធិបតីអាមេរិក លោក ដូណាល់ ត្រាំ រួចផុតការពីការប៉ុនប៉ងធ្វើឃាត។​ នេះបើតាមការចេញផ្សាយដោយទីភ្នាក់ងារសារព័ត៌មាន AFP។

បុរសខាងលើមានឈ្មោះ Jason Patrick Alday មានអាយុ៣៩ឆ្នាំ ត្រូវចាប់ខ្លួនកាលពីថ្ងៃចន្ទដើមសប្ដាហ៍កន្លងទៅ។ នេះបើតាមការិយាល័យរដ្ឋអាជ្ញាក្នុងរដ្ឋ Florida។ ការិយាល័យនេះដដែលបានឱ្យដឹងទៀតថាជនឈ្មោះ Alday មកពីទីក្រុង Quincy រដ្ឋ Florida ត្រូវបានចោទប្រកាន់ថាបានចូលរួមក្នុងសកម្មភាពបញ្ជូនសារគំរាមកំហែង ប្រឆាំងលោកប្រធានាធិបតី ចូ បៃដិន រួមទាំងមន្ត្រីសហព័ន្ធដទៃទៀត។ Alday បានធ្វើការគំរាមកំហែងពីលោក បៃដិន អំឡុងរូបគេកំពុងត្រួតពិនិត្យសុខភាព នៅឯ មន្ទីរពេទ្យផ្លូវចិត្តមួយក្នុងទីក្រុង Tallahassee រដ្ឋ Florida កាលពីខែមុន។ បន្ទាប់មកទៀត ទើបរូបគេបង្ហោះសារគំរាមនៅលើបណ្ដាញទំនាក់ទំនងសង្គម X ហើយបច្ចុប្បន្ន ជននេះត្រូវបានឃុំខ្លួនដើម្បីរង់ចាំសវនាការ។

គួរបញ្ជាក់ថា លោក ដូណាល់ ត្រាំ មានអាយុ ៧៨ឆ្នាំ បានរងរបួសស្រាលត្រង់សឹ្លកត្រចៀក អំឡុងរងការបាញ់ប្រហារមួយក្នុងពេលកំពុងថ្លែងសារ នៅឯយុទ្ធនាការឃោសនា បោះឆ្នោតក្នុងទីក្រុង Butler រដ្ឋ Pennsylvania កាលពីថ្ងៃសៅរ៍សប្ដាហ៍មុន។ ក្នុងឧបទ្ទវហេតុនេះ មានមនុស្សបានស្លាប់ រីឯខ្មាន់កាំភ្លើងឈ្មោះ Thomas Matthew Crooks មានអាយុ២០ឆ្នាំ ត្រូវបានបាញ់សម្លាប់នៅកន្លែង ដោយក្រុមអ្នកលបបាញ់នៃកងការពារ Secret Service។

ការប៉ុនប៉ងធ្វើឃាតនេះបានបង្កឱ្យមានការព្រួយបារម្ភរឹតតែខ្លាំងពីការបាក់បែកនយោបាយ និងហានិភ័យនៃការកើនឡើងអំពើហិង្សានយោបាយ ខណៈសហរដ្ឋអាមេរិក នឹងត្រូវរៀបចំការបោះឆ្នោតប្រធានាធិបតីនៅខែវិច្ឆិកាខាងមុខ៕