(យូអិន)៖ ប្រទេស្លូវេនី ដែលជាប្រធានប្តូរវេនប្រចាំខែកញ្ញា នៃក្រុមប្រឹក្សាសន្តិសុខអង្គការសហប្រជាតិ (UN) បានលើកឡើងថា ភាពអត់ធ្មត់ក្នុងចំណោមសមាជិកក្រុមប្រឹក្សា ហាក់ដូចជាអស់ហើយ ហើយស្ថាប័នដែលមានសមាជិកចំនួន ១៥នេះ ទំនងជានឹងពិចារណាចាត់វិធានការ ប្រសិនបើបទឈប់បាញ់មួយរវាងអ៉ីស្រាអែល-ហាម៉ាស មិនអាចសម្រេចបានឆាប់ៗទេនោះ។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃពុធ ទី៤ ខែកញ្ញា ឆ្នាំ ២០២៤។

បេសកជនរបស់ស្លូវេនីប្រចាំ UN លោក Samuel Zbogar គូសបញ្ជាក់ថា «មាន​ការ​ព្រួយ​បារម្ភ​នៅក្នុង​ក្រុម​ប្រឹក្សាសន្តិសុខ ​ជុំវិញវិធីសាស្រ្ត​ជំរុញ​បទ​ឈប់​បាញ់​ ឬ​អាចថាក្រុម​ប្រឹក្សា​ត្រូវពិចារណានូវជម្រើ​ស​អ្វី​ផ្សេង​ទៀត ​ដែល​អាច​​នាំទៅរក​បទ​ឈប់​បាញ់សម្រាប់តំបន់ហ្កាហ្សា»។ លោកប្រាប់ក្រុមអ្នកសារព័ត៌មានដូច្នេះថា «ខ្ញុំប្រាកដណាស់ថា នៅខែកញ្ញានេះ នឹងមានវិធានការ ឬវិធីសាស្រ្តមួយដែលត្រូវដាក់ចេញ ព្រោះមិនមែនយើងចង់នោះទេ ប៉ុន្តែក៏ព្រោះតែខ្ញុំគិតថា ភាពអត់ធ្មត់បានអស់ហើយ»។

គួរបញ្ជាក់ថា កាលពីខែមិថុនា ក្រុមប្រឹក្សាសន្តិសុខ UN បានដាក់ចេញនូវដំណោះស្រាយលេខ ២៧៣៥ ដោយគាំទ្រ ៣ចំណុចនៃផែនការប្រកាសដោយ លោក បៃដិន ប្រធានាធិបតីអាមេរិក សម្រាប់បទឈប់បាញ់ហ្កាហ្សា រួមទាំងការដោះលែងចំណាប់ខ្មាំងពីដៃក្រុមហាម៉ាស។ យ៉ាងនេះក្តី កិច្ចខិតខំប្រឹងប្រែងដឹកនាំដោយសហរដ្ឋអាមេរិក អេហ្ស៉ីប កាតា មិនទាន់ឈានដល់កិច្ចព្រមព្រៀងណាមួយនៅឡើយទេ រវាងអ៉ីស្រាអែល និងក្រុមហាម៉ាស មកទល់បច្ចុប្បន្ន៕