(ណៃពិដោ)៖ គិតត្រឹមថ្ងៃអាទិត្យ ទី១៥ ខែកញ្ញា តួលេខអ្នកបាត់បង់ជីវិត ដោយសារគ្រោះទឹកជំនន់ នៅក្នុងប្រទេសមីយ៉ាន់ម៉ា បានបន្តកើនដល់យ៉ាងហោច ១១៣នាក់ ក្រោយការជះឥទ្ធិពលយ៉ាងខ្លាំងក្លា នៃព្យុះទីហ្វុង Yagi នៅតំបន់អាស៉ីអាគ្នេយ៍។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

អ្នកនាំពាក្យរដ្ឋាភិបាលយោធាមីយ៉ាន់ម៉ា បានឱ្យដឹងថា ទន្ទឹមគ្នាេះ មនុស្សយ៉ាងហោចកើនដល់ ៣២០,០០០នាក់ ត្រូវបានជម្លៀសខ្លួនទៅកាន់​កន្លែងសុវត្ថិភាព ខណៈ៦៤នាក់បន្តបាត់ខ្លួន។ បើតាមអង្គការសហប្រជាជាតិ គ្រោះទឹកជំនន់បានបង្កការប៉ះពាល់ជាចម្បង នៅ​រដ្ឋធានីណៃពិដោ ព្រមទាំងតំបន់ Mandalay, Magway និង Bango រួមជាមួយរដ្ឋ Shan, Mon, Kayah និង Kayin។

បើតាមប្រព័ន្ធផ្សព្វផ្សាយរដ្ឋមីយ៉ាន់ម៉ា​ ទំនប់ទឹក៥កន្លែង វត្តអារាម៤កន្លែង និងលំនៅដ្ឋានច្រើនជាង៦៥,០០០នាក់ ត្រូវបានបំផ្លិចបំផ្លាញ​ដោយសារគ្រោះទឹកជំនន់។ គ្រោះធម្មជាតិនេះ ជាការបន្ថែមទុក្ខវេទនាលើភាពវឹកវរ ដែលប្រទេសអាស៊ានមួយនេះ បានធ្លាក់ទៅក្នុង ចាប់តាំងពី​រដ្ឋប្រហារយោធាឆ្នាំ២០២១។ អង្គការសហប្រជាជាតិ បានអះអាងថា ប្រហែល១ភាគ៣ នៃប្រជាជនមីយ៉ាន់ម៉ាសរុប ៥៥លាននាក់ ត្រូវការជំនួយមនុស្សធម៌។

គួរបញ្ជាក់ថា ស្ថានភាពអាកាសធាតុអាក្រក់ បង្កឡើងដោយសារព្យុះទីហ្វុង Yagi ដែលជាព្យុះសាហាវបំផុតនៅអាស៉ី ក្នុងឆ្នាំនេះ បានសម្លាប់មនុស្សសរុបរាប់រយនាក់ នៅក្នុងប្រទេសវៀតណាមនិងថៃ ដោយវៀតណាមរងគ្រោះខ្លាំងជាងគេបង្អស់ ហើយទីក្រុង​ជាច្រើន នៅក្នុងប្រទេសទាំងពីរ បានទទួលរងការជន់លិចយ៉ាងធ្ងន់ធ្ងរ។ គ្រោះទឹកជំនន់នៅមីយ៉ាន់ម៉ា បានចាប់ផ្តើមកាលពីថ្ងៃចន្ទ​ដើមសប្តាហ៍កន្លងទៅ បន្ទាប់ពីព្យុះ Yagi បានទៅដល់ភាគខាងជើងវៀតណាម នៅចុងសប្តាហ៍មុននោះ៕