(កូឡុំបូ)៖ មេដឹកនាំឆ្វេងនិយមរបស់ប្រទេសស្រីលង្កា លោក Anura Kumara Dissanayake បានឡើងកាន់តំណែងជា ប្រធានាធិបតី នៅថ្ងៃចន្ទ ទី២៣ ខែកញ្ញានេះ ដោយសន្យាថានឹងធ្វើឱ្យប្រទេសមានការផ្លាស់ប្តូរ ខណៈកំពុងព្យាយាមងើបចេញពី វិបត្តិសេដ្ឋកិច្ចដ៏អាក្រក់បំផុត ក្នុងរយៈពេលជាង ៧ទសវត្សរ៍។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ក្នុងសុន្ទរកថាដំបូង នៅឯការិយាល័យប្រធានាធិបតី លោក Dissanayake អាយុ ៥៥ឆ្នាំ បានគូសបញ្ជាក់ថា «ខ្ញុំសូមសន្យាយកចិត្តទុកដាក់ការពារ និងលើកកម្ពស់លទ្ធិប្រជាធិបតេយ្យ»។ លោកបាន​បន្ថែម​ថា «នយោបាយ​របស់យើង​ត្រូវ​តែ​ស្អាត​ស្អំ ហើយ​ប្រជាជន​អំពាវនាវ​ឱ្យ​មានវប្បធម៌​នយោបាយ​ចម្រុះ។ ខ្ញុំ​ បានត្រៀមខ្លួនជា​ស្រេច​ ដើម្បីប្តេជ្ញាចិត្តចំពោះ​ការ​ផ្លាស់​ប្តូរ​នេះ»។

គួរបញ្ជាក់ថា កិច្ចការដែល លោកប្រធានាធិបតីរូបនេះ ត្រូវប្រឈមមុខរួមមាន ការបង្កើតគណៈរដ្ឋមន្ត្រីថ្មី និងការបញ្ចុះបញ្ចូលសភា ដែលគណបក្សរបស់លោក មានត្រឹមតែ ៣អាសនៈប៉ុណ្ណោះ ក្នុងចំណោម ២២៥ ដើម្បីឈានទៅអនុម័តថវិកាក្រោមលក្ខខណ្ឌ នៃថវិកាសង្គ្រោះចំនួន ២.៩ពាន់លានដុល្លារ ពីមូលនិធិរូបិយវត្ថុអន្តរជាតិ (IMF)៕