(ហ៊្សេរុយសាឡិម)៖ យោធាអ៉ីស្រាអែលនិយាយថា សំលេងស៉ីរ៉ែននៃការវាយឆ្មក់តាមអាកាសបានបន្លឺឡើងទូទាំងភាគកណ្តាលប្រទេស កាលពីថ្ងៃសៅរ៍ រួមទាំងនៅក្នុងទីក្រុង Tel Aviv បន្ទាប់ពីមានមីស៉ីលមួយគ្រាប់បាញ់ចេញពីប្រទេសយេម៉ែន និងត្រូវបានស្ទាក់ចាប់។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters នៅថ្ងៃអាទិត្យ ទី២៩ ខែកញ្ញា ឆ្នាំ ២០២៤។

ក្រោយមក ក្រុម Houthi នៅយេម៉ែន បាននិយាយថា ពួកគេជាអ្នកបាញ់មីស៉ីលផ្លោងមួយគ្រាប់ ទៅអាកាសយានដ្ឋានអន្តរជាតិ Ben Gurion ក្បែរទីក្រុង Tel Aviv។ ពួកគេនិយាយថា ការ​វាយ​ប្រហារ​នោះកំណត់​ឡើងឱ្យស្រប​ពេល​ដែល លោក Benjamin Netanyahu នាយករដ្ឋមន្រ្តីអ៉ីស្រាអែល ត្រលប់មកប្រទេសវិញកាលពីថ្ងៃសៅរ៍ ក្រោយចូលរួមមហាសន្និបាតរបស់អង្គការសហប្រជាជាតិ។ នេះជាការវាយកប្រហារដោយមីស៉ីលលើកទី​ពីរ ​ក្នុង​រយៈពេល​តិចជាង​ពីរ​ថ្ងៃ​របស់ក្រុម Houthi មកលើអ៉ីស្រាអែល។

គួរបញ្ជាក់ថា ចលនាប្រដាប់អាវុធនៅយេម៉ែនមួយនេះ កំពុងចូលរួមកាន់ទុក្ខចំពោះការស្លាប់របស់មេដឹកនាំក្រុមហេសបូឡា លោក Hassan Nasrallah ដែលជាក្រុមសម្ព័ន្ធមិត្តរបស់ខ្លួនទទួលបានការគាំទ្រពីអ៉ីរ៉ង់ ហើយបាននិងកំពុងធ្វើសកម្មភាពប្រឆាំងអ៉ីស្រាអែល៕