(ហ្សេរ៉ូសាឡឹម)៖ ជម្លោះកាន់តែខ្លាំងឡើងនៅមជ្ឈិមបូព៌ា បានបង្កផលប៉ះពាល់ដល់ការធ្វើដំណើរតាមផ្លូវអាកាស ដោយក្រុមហ៊ុនអាកាសចរណ៍ជាច្រើនបានបង្វែរ ឬលុបចោលជើងហោះហើរ ដើម្បីជៀសវាងតំបន់ជម្លោះ។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃទី០២​ ខែតុលា ឆ្នាំ២០២៤។

អាកាសយានដ្ឋាននៅលីបង់ អ៊ីស្រាអែល និងគូវ៉ែត ក៏បានរាយការណ៍ពីការពន្យារពេលជើងហោះហើរយូរផងដែរ។

ក្រុមហ៊ុនអាកាសចរណ៍ LOT របស់ប៉ូឡូញបានបញ្ជាក់ថា ជើងហោះហើររបស់ខ្លួនកំពុងជៀសវាងដែនអាកាសអ៊ីរ៉ង់ រហូតដល់មានការជូនដំណឹងបន្ថែម។ និយតករសុវត្ថិភាពអាកាសចរណ៍អឺរ៉ុប (EASA) ក៏បានចេញសេចក្តីណែនាំដល់ក្រុមហ៊ុនអាកាសចរណ៍ ឱ្យជៀសវាងដែនអាកាសអ៊ីស្រាអែល និងលីបង់ផងដែរ។

ក្រុមហ៊ុនអាកាសចរណ៍ធំៗជាច្រើន រួមទាំង British Airways និង Air France-KLM បានលុបចោលជើងហោះហើរទៅកាន់អ៊ីស្រាអែល និងលីបង់ រហូតដល់យ៉ាងហោចណាស់ដើមសប្តាហ៍ក្រោយ។ ការលុបចោលជើងហោះហើរទាំងនេះ បានប៉ះពាល់ដល់ភាគហ៊ុនក្រុមហ៊ុនអាកាសចរណ៍ និងវិស័យទេសចរណ៍ ដោយភាគហ៊ុនរបស់ក្រុមហ៊ុន TUI និង Lufthansa បានធ្លាក់ចុះគួរឱ្យកត់សម្គាល់។

ការរំខានដល់ការធ្វើដំណើរតាមផ្លូវអាកាសនេះ ទំនងជានឹងបន្ត ខណៈដែលជម្លោះនៅមជ្ឈិមបូព៌ានៅតែមិនទាន់មានដំណោះស្រាយ។ ក្រុមហ៊ុនអាកាសចរណ៍ និងអ្នកដំណើរ កំពុងតាមដានស្ថានការណ៍យ៉ាងដិតដល់ ដើម្បីវាយតម្លៃពីផលប៉ះពាល់ និងធ្វើការសម្រេចចិត្តទៅតាមស្ថានការណ៍ជាក់ស្តែង៕