(ហ៊្សេរុយសាឡិម)៖ រដ្ឋមន្រ្តីថាមពលអ៉ីស្រាអែល លោក Eli Cohen នាថ្ងៃចន្ទ ទី១៤ ខែតុលា បានចោទប្រកាន់កងទ័ពមួកខៀវ របស់អង្គការសហប្រជាជាតិ (UN) ដែលឈរជើងនៅភាគខាងត្បូងប្រទេសលីបង់ ថាជាកងកម្លាំងឥតប្រយោជន៍ ដែលបរាជ័យ ក្នុងការការពារប្រជាជនអ៉ីស្រាអែល ពីការវាយប្រហារ​របស់ក្រុមហេសបូឡា ហើយបានអំពាវនាវឱ្យកងកម្លាំងរក្សាសន្តិភាព UN នេះ ដកខ្លួនចេញ។ នេះបើតាមការចេញផ្សាយ ដោយទីភ្នាក់ងារព័ត៌មាន Reuters។

លោក Cohen បានបង្ហោះសារលើប្រព័ន្ធ X ដូច្នេះថា «ប្រទេសអ៉ីស្រាអែល នឹងធ្វើគ្រប់យ៉ាងដើម្បីធានាសុវត្ថិភាពពលរដ្ឋខ្លួន ហើយប្រសិនបើ UN មិនអាចជួយអ្វីទេនោះ យ៉ាងហោចណាស់ គួរតែកុំមកលូកដៃជ្រៀតជ្រែក ហើយចល័តកងកម្លាំងរបស់ខ្លួន ចេញឱ្យឆ្ងាយពីតំបន់ប្រយុទ្ធគ្នា»។ យោធាអ៉ីស្រាអែល បាននិងកំពុងបង្កើនការប្រយុទ្ធយ៉ាងក្តៅគគុក នៅភាគខាងត្បូងលីបង់ ដើម្បីកម្ចាត់ក្រុមហេសបូឡា ដែលគាំទ្រដោយអ៉ីរ៉ង់។

កាលពីសប្តាហ៍មុន ​UN បានអះអាងថា កងកម្លាំងរក្សាសន្តិភាពមួយចំនួន បានរងរបួស ក្រោយទីតាំងពួកគេ បានស្ថិតក្រោម​ការវាយប្រហារម្តងហើយម្តងទៀត ពីអ៉ីស្រាអែល ហើយកាលពីថ្ងៃអាទិត្យកន្លងទៅនេះ រថក្រោះអ៉ីស្រាអែល បានបើកទម្លុះចូល​មូលដ្ឋាន កងរក្សាសន្តិភាពនៅលីបង់តែម្តង។

រីឯនាយករដ្ឋមន្រ្តីអ៉ីស្រាអែល លោក Benjamin Netanyahu បានចោទប្រកាន់ថា កងកម្លាំងរក្សាសន្តិភាពរបស់ UN ឬកងទ័ពមួកខៀវ កំពុងដើរតួនាទីជាខែល សម្រាប់ក្រុមហេសបូឡា ហើយបានទាមទារឱ្យអគ្គលេខាធិការ UN ដកកងកម្លាំងរក្សាសន្តិភាពនៅលីបង់ ហៅកាត់ថា UNIFIL ចេញពី​កន្លែងប្រយុទ្ធគ្នារវាងកងទ័ពអ៉ីស្រាអែល និងក្រុមអ្នកប្រយុទ្ធរបស់ហេសបូឡា។ ក្រុមហេសបូឡា បានបដិសេធថា ខ្លួនមិនបានប្រើប្រាស់ កងកម្លាំង UNIFIL សម្រាប់ជាខែលការពារឡើយ។

គួរបញ្ជាក់ថា ជម្លោះរវាងអ៉ីស្រាអែលនិងហេសបូឡា បានបន្តឡើងវិញកាលពីមួយឆ្នាំមុន នៅពេលចលនាប្រដាប់អាវុធលីបង់មួយនេះ បានចាប់ផ្តើមបាញ់គ្រាប់រ៉ុក្កែត លើភាគខាងជើងអ៉ីស្រាអែល ក្រោមគោលបំណងគាំទ្រដល់ ក្រុមហាម៉ាសប៉ាឡេស្ទីន អំឡុងការផ្ទុះឡើងដំបូង នៃសង្រ្គាមនៅតំបន់ហ្កាហ្សា ហើយជម្លោះរវាងភាគីទាំងពីរ បានកើនឡើងកម្តៅយ៉ាងគំហុក កាលពីខែមុន៕