(បេរូត)៖ ទីភ្នាក់ងារជនភៀសខ្លួនរបស់អង្គការសហប្រជាជាតិ (UNHCR) បានរាយការណ៍ថា ការបញ្ជាឱ្យជម្លៀសប្រជាជនថ្មីរបស់អ៊ីស្រាអែលទៅកាន់ភូមិចំនួន ២០ បន្ថែមទៀត នៅភាគខាងត្បូងប្រទេសលីបង់ មានន័យថា ជាង ២៥% នៃប្រទេសលីបង់ឥឡូវនេះស្ថិតក្រោមការបញ្ជាឱ្យជម្លៀសចេញពីផ្ទះសម្បែង។ នេះបើយោងតាមការចេញផ្សាយដោយ ទីភ្នាក់ងារសារព័ត៌មាន Reuters។

លោកស្រី Rema Jamous Imseis នាយកមជ្ឈិមបូព៌ារបស់ទីភ្នាក់ងារនេះ បាននិយាយថា «មនុស្សកំពុងធ្វើតាមការអំពាវនាវទាំងនេះឱ្យជម្លៀសចេញ ហើយពួកគេកំពុងភៀសខ្លួនស្ទើរតែទាំងអស់»។ លោកបានបន្តថា​ ប្រជាជនភាគច្រើននៅភាគខាងត្បូងប្រទេសលីបង់បានជម្លៀសចេញពីផ្ទះរបស់ពួកគេ ដោយបន្សល់ទុកទីក្រុងទាំងមូលដូចជា Tire និង Nabatieh នៅទទេស្អាត។ ពួកគេបានភៀសខ្លួនទៅកាន់ទីក្រុងនានានៅភាគខាងជើង ជាពិសេសស៊ីដុន (Sidon) បេរូត និងទ្រីប៉ូលី (Tripoli)។

អ្នកនាំពាក្យកងទ័ពអ៊ីស្រាអែល លោក Avichay Adraee បានព្រមានថា អ្នកដែលនៅសេសសល់នៅភាគខាងត្បូងទន្លេ Awali ស្ថិតក្នុងគ្រោះថ្នាក់ ហើយតំបន់នោះត្រូវបានចាត់ទុកថាជាតំបន់គ្មានភ្លើង។ ទោះជាយ៉ាងណាក៏ដោយ ការវាយប្រហារតាមអាកាសរបស់អ៊ីស្រាអែលក៏បានកើតឡើងនៅទូទាំងប្រទេសលីបង់ រួមទាំងទីក្រុងបេរូតផងដែរ។ ការិយាល័យសិទ្ធិមនុស្សរបស់អង្គការសហប្រជាជាតិបានរាយការណ៍ថា ជនរងគ្រោះភាគច្រើននៃការវាយប្រហារទាំងនេះគឺជាស្ត្រី និងកុមារ។

នាយករដ្ឋមន្ត្រីលីបង់ លោក Najib Mikati បានប្រកាសថា លោកនឹងដាក់សំណើទៅក្រុមប្រឹក្សាសន្តិសុខអង្គការសហប្រជាជាតិសម្រាប់បទឈប់បាញ់ និងកំពុងខិតខំប្រឹងប្រែងដើម្បីការពារការវាយប្រហារបន្ថែមទៀតលើទីក្រុងបេរូត។ រដ្ឋាភិបាលលីបង់បានរាយការណ៍ថា មនុស្សជាង ២,៣០៩ នាក់បានស្លាប់ និងជាង ១.២ លាននាក់ត្រូវបានផ្លាស់ទីលំនៅ ចាប់តាំងពីអ៊ីស្រាអែលបានចាប់ផ្តើមយុទ្ធនាការយោធារបស់ខ្លួនកាលពីដើមខែនេះ៕