(ហាណូយ)៖ សភាជាតិវៀតណាម នៅថ្ងៃចន្ទ ទី២១ ខែតុលានេះ បានបោះឆ្នោតតែងតាំងលោក Luong Cuong ជាប្រធានាធិបតី។ នេះបើតាមការចេញផ្សាយដោយទីភ្នាក់ងារសារព័ត៌មាន Reuters។

ការតែងតាំងលោក Luong Cuong ធ្វើឡើងបន្ទាប់ពីលោក To Lam បានសម្រេចចិត្តលាលែងចេញពីតំណែងប្រធានាធិបតី ដើម្បីទុកឱ្យតំណែងនេះឱ្យអ្នកផ្សេង ហើយរូបលោកបន្តកាន់តំណែង ជាអគ្គលេខាធិការបក្សកុម្មុយនិស្ដវៀតណាម។ មុនត្រូវបាន​តែងតាំងជាប្រធានាធិបតី លោក Cuong អាយុ៦៧ឆ្នាំ មានឋានន្តរសក្តិជានាយឧត្តមសេនីយ៍ (ផ្កាយ៤) និងបានកាន់តួនាទីជា សមាជិកអចិន្ត្រៃយ៍ នៃលេខាធិការដ្ឋានបក្សកុម្មុយនិស្ដវៀតណាម ចាប់តាំងពីខែឧសភា ឆ្នាំ២០២៤មក។

ដោយឡែក លោក To Lam ដែលមានអាយុ ៦៧ឆ្នាំ ត្រូវបានតែងតាំងជា អគ្គលេខាធិការថ្មីកាលពី​ដើមខែសីហាកន្លងទៅនេះ បូកបន្ថែមពីលើប្រធានាធិបតីនៅពេលនោះ ក្រោយមរណភាពរបស់លោក Nguyen Phu Trong។

*តើលោក Luong Cuong ជានរណា?

លោក Luong Cuong មានអាយុ៦៧ឆ្នាំ និងមានដើមកំណើតមកពីខេត្ត Phu Tho នៃភាគខាងជើងនៃប្រទេសវៀតណាម។ លោកជាសមាជិកម្នាក់នៃគណៈកម្មាធិការមជ្ឈិម ការិយាល័យនយោបាយ និងលេខាធិការរដ្ឋាននៃគណបក្សកុម្មុយនិស្តវៀតណាម។ លោកបានចូលបម្រើការក្នុងជួរកងទ័ពវៀតណាម ក្នុងឆ្នាំ១៩៧៥ មុននឹងក្លាយជានាយករងនៃអគ្គនាយកដ្ឋាននយោបាយក្នុងឆ្នាំ២០១១ និងក្លាយជានាយកនៃអគ្គនាយកដ្ឋាននយោបាយក្នុងឆ្នាំ២០១៦។ នៅខែមករា ឆ្នាំ២០១៩ លោកត្រូវបានដំឡើងតំណែងជាឧត្តមសេនីយ៍ ដែលធ្វើឱ្យលោកក្លាយជាបុគ្គលទី១៥ ដែលបានកាន់តំណែងជាន់ ខ្ពស់នៅក្នុងជួរកងទ័ពវៀតណាម។

លោក Luong Cuong ត្រូវបានតែងតាំងដោយការិយាល័យនយោបាយជាសមាជិកអចិន្ត្រៃយ៍នៃលេខាធិការរដ្ឋាននៃគណៈកម្មាធិការមជ្ឈិមបក្សកាលពីខែឧសភា ឆ្នាំ២០២៤ ដើម្បីជំនួសលោកស្រី Truong Thi Mai។

គួរបញ្ជាក់ថា លោក Luong Cuong ត្រូវបានតែងតាំងជាប្រធានាធិបតីវៀតណាម សម្រាប់អាណត្តិពីឆ្នាំ២០២១ ដល់ឆ្នាំ២០២៦។ លោកទទួលបានសំឡេងគាំទ្រ១០០ភាគរយពីសមាជិកសភា ៤៤០រូប។ នៅវៀតណាម រចនាសម្ព័ន្ធថ្នាក់ដឹកនាំ មានសសរស្តម្ភនៃតំណែងកំពូលៗចំនួន ៤ រួមមានអគ្គលេខាធិការបក្ស ប្រធានាធិបតី នាយករដ្ឋមន្រ្តី និងប្រធានរដ្ឋសភា៕