(ហាណូយ)៖ នាយករដ្ឋមន្រ្តីវៀតណាម លោក Pham Minh Chinh បាននិយាយថា វៀតណាមត្រៀមខ្លួនរួចរាល់ ដើម្បីធ្វើការ​ជាមួយក្រុម BRICS ស្របពេលដែលរូបលោក បានចូលរួម កិច្ចប្រជុំកំពូលរបស់ប្លុកនេះជាលើកដំបូង ក្នុងសប្តាហ៍នេះ ហើយបាន​បើកកិច្ចពិភាក្សាជាមេដឹកនាំរុស្ស៉ីនិងចិន។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ទោះជាបែបនេះក៏ដោយ លោក Chinh មិនបានលើកឡើងចំៗថា វៀតណាមមានចំណាប់អារម្មណ៍ ចង់ចូលរួមជាសមាជិក BRICS តែម្តងឡើយ ខណៈបើធ្វើដូច្នោះ វាអាចនឹងជួយឱ្យវៀតណាម កាន់តែជិតស្និទ្ធថែមទៀតជាមួយចិននិងរុស្ស៉ី ប៉ុន្តែទន្ទឹមគ្នា ក៏អាចប៉ះពាល់​ដល់ទំនាក់ទំនង ជាមួយសហរដ្ឋអាមេរិក ផងដែរ។

ដោយឡែក មន្រ្តីវៀតណាមម្នាក់ បានប្រាប់ Reuters នៅមុនកិច្ចប្រជុំកំពូល BRICS ដែលត្រូវបានរៀបចំឡើងនៅទីក្រុង Kazan នៃប្រទេសរុស្ស៉ី និងបញ្ចប់ទៅវិញ កាលពីថ្ងៃព្រហស្បតិ៍ថា វៀតណាមចាប់អារម្មណ៍ ចង់ចូលរួមជាមួយ BRICS ប៉ុន្តែមិនច្បាស់ថា នៅពេល​ណា ឬចូលរួមក្នុងកម្រិតណាឡើយ។ ចំណែកឯ មន្រ្តីម្នាក់មកពីប្រទេស BRICS មួយ ក៏បានបង្ហើបឱ្យដឹងដែរថា វៀតណាមបានបង្ហាញចំណាប់អារម្មណ៍ ចង់ចូលរួមជាដៃគូរបស់ BRICS ដែលជាជំហានមួយ អាចឆ្ពោះទៅរកសមាជិកភាព។

គួរបញ្ជាក់ថា បច្ចុប្បន្នសមាជិក BRICS រួមមានចិន រុស្ស៉ី ឥណ្ឌា ប្រេស៉ីល អាហ្រ្វិកខាងត្បូង អ៉ីរ៉ង់ អេហ្ស៉ីប អេត្យូពី និង​អេមីរ៉ាតអារ៉ាប់រួម។ កាលពីថ្ងៃព្រហស្បតិ៍ BRICS បានប្រកាសទទួលស្គាល់ ប្រទេសចំនួន១៣ផ្សេងទៀត ក្នុងនាមជាដៃគូ រួមមាន​ម៉ាឡេស៉ី ឥណ្ឌូណេស៉ី ថៃ វៀតណាម អាល់ហ្សេរី បេឡារុស បូលីវី គុយបា កាហ្សាក់ស្ថាន នីហ្សេរីយ៉ា តួកគី អ៊ូហ្កង់ដា និង អ៊ូសបេគីស្ថាន៕