\(ម៉ាឌ្រីដ)៖ អភិបាលតំបន់ Valencia ប្រទេសអេស្ប៉ាញ បានប្រាប់អ្នកយកព័ត៌មាន នៅថ្ងៃពុធ ទី៣០ ខែតុលានេះថា សាកសពមនុស្សមួយចំនួន ត្រូវបានរកឃើញនៅទីតាំង ដែលរងគ្រោះដោយទឹកជំនន់ នៅឯភាគអាគ្នេយ៍នៃប្រទេស។ នេះបើយោងតាមការចេញផ្សាយដោយទីភ្នាក់ងារសារព័ត៌មាន Reuters។

ភ្លៀងធ្លាក់ខ្លាំង ដែលបានបោកបក់ឆ្លងកាត់ភាគអាគ្នេយ៍ ប្រទេសអេស្បាញ បណ្តាលឱ្យជន់លិចផ្លូវថ្នល់ និងទីប្រជុំជននានា កាលពីថ្ងៃអង្គារសប្តាហ៍នេះ ដោយជំរុញឱ្យអាជ្ញាធរនៅក្នុងតំបន់រងគ្រោះខ្លាំង ណែនាំដល់ពលរដ្ឋឱ្យស្នាក់នៅផ្ទះ និងចៀសវាងការធ្វើដំណើរដែលមិនចាំបាច់។

ទីភ្នាក់ងារឧតុនិយមរដ្ឋ AEMET បានប្រកាសអាសន្នព័ណ៌ក្រហម នៅ​ភាគ​ខាង​កើតតំបន់ Valencia ដោយ​កន្លែងខ្លះទទួល​រងនូវភ្លៀង​ធ្លាក់កម្រិត ២០០មីលីម៉ែត្រ។ តាមលោក Carlos Mazon ដែលជាអភិបាលតំបន់ Valencia «មានការប្រទះឃើញសាកសពមនុស្សមួយចំនួន ប៉ុន្តែដោយការគោរពចំពោះក្រុមគ្រួសារជនរងគ្រោះ យើងនឹងមិនលម្អិតព័ត៌មាននេះ បន្ថែមទៀតទេ»។

ក្រុមអ្នក​វិទ្យាសាស្ត្រ​ បាននិយាយ​ថា គ្រោះធម្មជាតិធ្ងន់ធ្ងរ កើតមានឡើង​កាន់តែ​ញឹកញាប់ ​ដោយសារ​តែការ​ប្រែប្រួល​អាកាសធាតុ។ អ្នកឧតុនិយមជឿជាក់ថា ការឡើងកំដៅក្នុងសមុទ្រមេឌីទែរ៉ាណេ ធ្វើឱ្យទឹកសមុទ្ររីង ជាហេតុនាំឱ្យមានភ្លៀងធ្លាក់ ក្នុងកម្រិតខ្លាំងក្លាផងដែរ៕