(ប៉េកាំង)៖ គំនិតផ្តួចផ្តើមអភិវឌ្ឍសាកលត្រូវបានគេដឹងទូទាំងពិភពលោកថា ជាគំនិតផ្តួចផ្តើមមួយ ដែលបានលើកឡើងដោយ លោកប្រធានរដ្ឋចិន ស៊ី ជិនភីង ក្នុងឱកាសនៃកិច្ចពិភាក្សាលើកទី៧៦ នៃកិច្ចប្រជុំអង្គការសហប្រជាជាតិ ថ្ងៃទី២១ ខែកញ្ញា ឆ្នាំ២០២១ និង បានលើកឡើងនៅក្នុងខែមិថុនា ឆ្នាំ២០២២ ក្នុងគោលបំណងសម្រេចបាននូវរបៀបវារៈ នៃគោលដៅអភិវឌ្ឍន៍សហសវត្ស នៅឆ្នាំ២០៣០ សម្រាប់ការអភិវឌ្ឍប្រកបដោយនិរន្តរភាព តាមរយៈ ការធ្វើឱ្យរស់ឡើងវិញ នូវភាពជាដៃគូអភិវឌ្ឍន៍ និង ជំរុញឱ្យប្រសើរឡើងនូវការអភិវឌ្ឍខ្លាំងក្លា បៃតង និង សុខភាពល្អ។
កាលពីថ្ងៃទី២៤ ខែមិថុនា ឆ្នាំ២០២២ លោកប្រធានរដ្ឋចិន ស៊ី ជិនភីង បានធ្វើជាអធិបតីក្នុងកិច្ចសន្ទនាជាន់ខ្ពស់ ស្តីពីការអភិវឌ្ឍសកលតាមប្រព័ន្ធវីដេអូ លោកបានលើកឡើងគំនិតផ្តួចផ្តើម ៤ចំណុច ពោលគឺរួមគ្នាប្រមូលផ្តុំនិងជំរុញ គំនិតឯកភាពរួម ស្តីពីការជំរុញការអភិវឌ្ឍ រួមគ្នាបង្កបរិយាកាសអន្តរជាតិដែលមានអំណោយផលដល់ការអភិវឌ្ឍ រួមគ្នាពូនជ្រំកម្លាំងចលករថ្មី សម្រាប់ការអភិវឌ្ឍសកល និង រួមគ្នាបង្កើតទំនាក់ទំនងភាពជាដៃគូអភិវឌ្ឍន៍សកល គំនិតផ្តួចផ្តើមទាំងនេះបានចង្អុលបង្ហាញយ៉ាងច្បាស់លាស់ នូវទិសដៅសម្រាប់ជំរុញ បុព្វហេតុអភិវឌ្ឍន៍សកល និងកិច្ចសហប្រតិបតិ្តការអភិវឌ្ឍន៍សកល ហើយត្រូវបានតំណាងជាង១០០ប្រទេស នៅលើសាកលលោកគាំទ្រ ជាពិសេសទៅទៀតនោះ គំនិតផ្តួចផ្តើមអភិវឌ្ឍន៍សកលនេះ ត្រូវបានលើកឡើងចំពេលវេលាដ៏ល្អ ដែលពិភពលោក កំពុងប្រឈមនឹងហានិភ័យ និង វិបត្តិនានាជាបន្តបន្ទាប់។
គំនិតផ្តួចផ្តើមអភិវឌ្ឍន៍សកល គឺជាគោលគំនិតមួយដែលបានចាត់ទុក ការអភិវឌ្ឍជាស្នូលអាទិភាពពិភពលោក ដែលការអភិវឌ្ឍនេះ បានត្រូវបានធ្វើឡើងដោយយកប្រជាជនគោលចម្បង ប្រកាន់ខ្ជាប់ការផ្តល់ផលប្រយោជន៍ជាទូទៅ ប្រកបដោយបរិយាប័ន្ន ជំរុញការច្នៃប្រឌិតថី្ម និង រួមរស់នៅប្រកបដោយសុខដុមរមនា រវាងមនុស្សជាតិនិងធម្មជាតិ និង ប្រកាន់ខ្ជាប់នូវទិសដៅប្រតិបតិ្ត។ គំនិតផ្តួចផ្តើមសាកល ត្រូវបានមើលឃើញថា នឹងជំរុញកិច្ចសហប្រតិបតិ្តការជាអន្តរជាតិ លើវិស័យកាត់បន្ថយភាពក្រីក្រ សន្តិសុខស្បៀងអាហារ ការប្រយុទ្ធប្រឆាំងនឹងជំងឺកូវីដ១៩ ការចាក់វ៉ាក់សាំង ការកៀរគរប្រាក់ទុន សម្រាប់ការអភិវឌ្ឍ បម្រែបម្រួលអាកាសធាតុ ការអភិវឌ្ឍបៃតង ឧស្សាហូបនីយកម្ម សេដ្ឋកិច្ចឌីជីថល និង ការតភ្ជាប់គ្នាជាដើម។ គំនិតផ្តួចផ្តើមនេះ ត្រូវបានលើកឡើងដើម្បីជាយុទ្ធសាស្រ្តស្នូលមួយ សម្រាប់គាំទ្រដល់ទស្សនវិស័យរួមរបស់លោក ស៊ី ជិនភីង គឺការឈានទៅដល់ ការបង្កើតសហគមន៍រួមវាសនាតែមួយ នៃការអភិវឌ្ឍសកល។
គោលការណ៍ស្នូលរបស់គំនិតផ្តួចផ្តើមនេះ ត្រូវបានមើលឃើញថាមានសារសំខាន់សម្រាប់ការអភិវឌ្ឍសាកល ដែលបានធ្វើឱ្យប្រទេសចំនួន ៦៨ ចូលរួមជាមួយ ក្នុងគោលបំណងជំរុញ កិច្ចសហប្រតិបត្តិការអន្តរជាតិ លើវិស័យអាទិភាពចំនួន៨ ដែលបានរៀបរាប់ខាងលើ។ ប្រទេសចិនជាប្រទេសឈានមុខគេ និងជាគំរូមួយ ក្នុងការលុបបំបាត់ភាពក្រីក្រ តាមរយៈការដាក់ចេញ នូវគោលនយោបាយអភិវឌ្ឍជនបទ បង្កើតការងារ និង ការអភិវឌ្ឍកម្លាំងពលកម្ម ដែលជាកម្លាំងចលករថ្មីក្នុងវិស័យកំណើន។ លើសពីនេះទៀត ប្រទេសចិន ក៏បានយកចិត្តទុកដាក់ដល់ វិស័យស្បៀងអាហារ ដោយបានដាក់ចេញនូវវិធានការនានាទាក់ទងនឹង សន្តិសុខស្បៀងអាហារ និង ធានាឱ្យបាននូវស្បៀងអាហារគ្រប់គ្រាន់សម្រាប់ប្រជាជន ព្រមទាំងយកចិត្តទុកដាក់យ៉ាងខ្លាំងលើ វិស័យបរិស្ថាន និង ការរស់នៅ។
វិស័យបរិស្ថាន និង បៃតងនេះ ជាវិស័យរួមមួយសម្រាប់សាកលលោកទាំងមូល ដែលអាចធ្វើឱ្យមនុស្សនិងបរិស្ថានអាចផ្សារ ជាមួយគ្នាយ៉ាងស្អិតរមួត បង្កើតការរស់នៅល្អប្រកបភាពសុខសាន្ត ទប់ស្កាត់នូវជំងឺឆ្លង និង ជំងឺរាតត្បាតនានា ជាពិសេសទប់ស្កាត់នូវការវិលត្រឡប់មកវិញនូវជំងឺកូវីដ១៩។ ក្រៅពីនេះទៀត ប្រទេសចិន ក៏ជាប្រទេសមួយដែលត្រូវបាន គេចាត់ទុកថាជាប្រទេសឈានមុខគេមួយ ក្នុងការអភិវឌ្ឍវិស័យបច្ចេកវិទ្យាឌីជីថល។ ការអភិវឌ្ឍសេដ្ឋកិច្ចតាមបែបឌីជីថលនេះ ត្រូវបានជ្រើសរើសជាអាទិភាពរបស់ សាធារណរដ្ឋប្រជាមានិតចិន និង ជារវៀបវារៈនៃការអភិវឌ្ឍរបស់ប្រទេសចិន ដែលអាចចាត់ទុកជាបទពិសោធន៍ដ៏ល្អសម្រាប់បណ្តារប្រទេសនានានៅ លើសាកលលោក និង ក្លាយជាប្រទេសមូលដ្ឋានគន្លឹះមួយ សម្រាប់បង្កើនការតភ្ជាប់បច្ចេកវិទ្យាឌីជីថល ក្នុង សាកលលោកផងដែរ។
ឧស្សាហកម្មដែលបានរួមចំណែកដោយកម្លាំងចលករកំណើនថ្មី ដែលមានដាក់បញ្ចូលនូវបច្ចេកវិទ្យាឌីជីថល ជាឧស្សាហកម្មដែលមានកម្លាំងផលិតភាពមុតស្រួច និង មានសំទុះខ្លាំងក្លា ដែលអាចរួមចំណែកឱ្យរចនាសម្ព័ន្តសេដ្ឋកិច្ចប្រទេស ក៏ដូចជាសេដ្ឋកិច្ចសាកលលោកកាន់តែរីកចម្រើនលឿនយ៉ាងឆាប់រហ័ស និង ប្រកបភាពធន់និងរឹងមាំ។ កម្លាំងចលករថ្មីនេះ ក៏បានរួចចំណែកជាមួយនឹងសាលកលោក និង អង្គការសហប្រជាជាតិ ដើម្បីធ្វើឱ្យសម្រេចបានជាលទ្ធផលល្អ និងជោគជ័យនៃគោលដៅអភិវឌ្ឍន៍ ប្រកបដោយនិរន្តរភាពសម្រាប់ឆ្នាំ២០៣០ ជាពិសេសគឺនិរន្តរភាពនៃខ្សែច្រវាក់ផលិតកម្ម នៃវិស័យឧស្សាហកម្ម និង ស្បៀងអាហារ។
ជាចុងក្រោយ គំនិតផ្តួចផ្តើមអភិវឌ្ឍន៍សាកលនេះ បានរួមចំណែកធ្វើឱ្យលំហូរនិងបម្លាស់ទីនៃធនធានមូលធនរបស់សាកលលោក ពូតផ្តុំឱ្យទៅជាធនធានសាកលថ្មីធំនិងរឹងមាំ សម្រាប់ជាកម្លាំងចលករថ្មីសម្រាប់ផលិតភាពសាកល បង្កើតជាថ្នាលនៃការអភិវឌ្ឍរួម ជាសាកលនិងដោះស្រាយនូវវិបត្តិនានា ព្រមទាំងពូតផ្តុំនូវបញ្ញាញាណ និង បញ្ញាវន្តក្នុងការរួបរួមគ្នាសម្រាប់ការអភិវឌ្ឍសាកល ដែលបានធ្វើឱ្យប្រជាជនលើពិភពលោកទាំងអស់ មើលពីសារសំខាន់ដ៏លើសលុប នៃគំនិតផ្តួចផ្តើមអភិវឌ្ឍសាកលមួយនេះ៕
ដោយបណ្ឌិត គី សេរីវឌ្ឍន៍
ប្រធានវិទ្យាស្ថានសិក្សាចិន នៃរាជបណ្ឌិត្យសភាកម្ពុជា
