(គួរឡាឡាំពួរ)៖ ម៉ាឡេស៊ីបានផ្ញើលិខិតប្តឹងតវ៉ាទៅកាន់វៀតណាម ជុំវិញការពង្រីកកោះសិប្បនិម្មិត នៅតំបន់ថ្មប៉ប្រះទឹក Barque Canada ក្នុងតំបន់សមុទ្រចិនខាងត្បូង ដែលប្រទេសទាំងពីរអះអាងថាជាកម្មសិទ្ធិរៀងៗខ្លួន។ នេះបើយោងតាមមន្ត្រីពីររូប ដែលបានប្រាប់ទីភ្នាក់ងារសារព័ត៌មាន Reuters។

ការប្តឹងតវ៉ានេះ បានបង្ហាញឱ្យឃើញពីភាពតានតឹងរវាងប្រទេសទាំងពីរ លើវិវាទដែនដីនៅសមុទ្រចិនខាងត្បូង ដែលភាគច្រើនចិនទាមទារកម្មសិទ្ធិរបស់ខ្លួន។ វាក៏ជាករណីកម្រមួយដែលមិនពាក់ព័ន្ធនឹងប្រទេសចិន ដែលជាធម្មតាជាប់ពាក់ព័ន្ធនឹងជម្លោះនៅក្នុងតំបន់នេះ។

រូបភាពផ្កាយរណបបានបង្ហាញថា វៀតណាមបាននិងកំពុងពង្រីក និងសាងសង់ហេដ្ឋារចនាសម្ព័ន្ធនៅតំបន់ថ្មប៉ប្រះទឹក Barque Canada ដែលជាផ្នែកមួយនៃប្រជុំកោះ Spratly ដែលមានជម្លោះ។ ម៉ាឡេស៊ីបានផ្ញើលិខិតតវ៉ាទៅកាន់វៀតណាមកាលពីខែតុលា ប៉ុន្តែមិនទាន់ទទួលបានការឆ្លើយតបនៅឡើយទេ។

ប្រទេសជាច្រើន រួមទាំងចិន តៃវ៉ាន់ ម៉ាឡេស៊ី វៀតណាម ប្រ៊ុយណេ និងហ្វីលីពីន សុទ្ធតែមានការទាមទារផ្នែកខ្លះនៃប្រជុំកោះ Spratly។ ប្រទេសទាំងនេះបាននិងកំពុងពង្រឹងការកាន់កាប់របស់ពួកគេ ដោយសាងសង់កោះសិប្បនិម្មិត និងហេដ្ឋារចនាសម្ព័ន្ធផ្សេងៗ។

គួរបញ្ជាក់ថា ទោះបីជាម៉ាឡេស៊ី និងវៀតណាមកម្រមានជម្លោះដែនដីធំដុំក៏ដោយ ក៏ប្រទេសទាំងពីរនៅតែមានបញ្ហាតូចតាចជាប្រចាំ ជាពិសេសទាក់ទងនឹងការនេសាទខុសច្បាប់។ ម៉ាឡេស៊ីបានចោទប្រកាន់អ្នកនេសាទវៀតណាមថា ចូលមកនេសាទក្នុងដែនទឹករបស់ខ្លួន ដែលជាហេតុនាំឱ្យមានការចាប់ខ្លួនអ្នកនេសាទវៀតណាមមួយចំនួនផងដែរ៕