(ម៉ានីល)៖ នៅថ្ងៃព្រហស្បតិ៍ ទី១៤ ខែវិច្ឆិកា ហ្វីលីពីនបានដំឡើងការប្រកាសអាសន្នអំពីព្យុះ ដល់កម្រិតខ្ពស់បំផុត និងបានជម្លៀស​មនុស្សរាប់ពាន់នាក់ ស្របពេលដែលព្យុះទីហ្វុងថ្មីមួយទៀត ឈ្មោះថា Usagi បាននិងកំពុងតែសំដៅឆ្ពោះមករកប្រទេសមួយនេះ។ នេះបើតាមការចេញផ្សាយដោយ ទីភ្នាក់ងារព័ត៌មាន Reuters។

ជាមួយកម្លាំងខ្យល់បក់១៨០គីឡូម៉ែត្រក្នុងមួយម៉ោង ព្យុះ Usagi ត្រូវបានព្យាករថា នឹងបោកបក់លើកោះ Luzon ដែលជាកោះធំ​របស់ប្រទេសហ្វីលីពីន ក្នុងថ្ងៃព្រហស្បតិ៍នេះ។ វាគឺជាព្យុះទី៥ហើយ ដែលវាយប្រហារលើហ្វីលីពីន ក្នុងរយៈពេលត្រឹម៣សប្តាហ៍។ ការវាយប្រហារពីព្យុះជាបន្តបន្ទាប់ បានសម្លាប់មនុស្សយ៉ាងហោច១៥៩នាក់ នៅក្នុងប្រទេសអាស៊ានមួយនេះ ហើយបានជំរុញឱ្យ​អង្គការសហប្រជាជាតិ ស្វែងរកថវិកាជិត៣៣លានដុល្លារ ដើម្បីយកទៅជួយតំបន់ដែលរងគ្រោះខ្លាំងៗជាងគេ។

គួរបញ្ជាក់ថា បន្ទាប់ពីព្យុះទីហ្វុង Usagi ព្យុះព្រូពិកឈ្មោះ Man-yi ក៏ត្រូវបានព្យាករថា នឹងវាយប្រហារលើហ្វីលីពីន នៅអំឡុង​ចុងសប្តាហ៍នេះផងដែរ។ ជាទូទៅ ហ្វីលីពីននិងតំបន់ជុំវិញ ទទួលរងការបោកបក់ពីព្យុះធំៗ និងព្យុះទីហ្វុងប្រហែលជា២០ព្យុះ ជារៀងរាល់ឆ្នាំ៕