(ប៊ុយណូសអ៊ែរ)៖ ប្រធានាធិបតីនៃប្រទេសអាហ្សង់ទីនលោក Javier Milei បានទាមទារឱ្យអាជ្ញាធរវ៉េណេស៊ុយអេឡា ដោះលែងជាបន្ទាន់នូវទាហានអាហ្សង់ទីន ដែលត្រូវចាប់ខ្លួនកាលពីដើមខែនេះ ដោយលោក Milei និយាយថាបានចូលទៅវ៉េណេស៊ុយអេឡា ដើម្បីសួរសុខទុក្ខក្រុមគ្រួសារ។ នេះបេីយោងតាមការចេញផ្សាយដោយ ទីភ្នាក់ងារសារព័ត៌មាន Reuters នៅថ្ងៃពុធ ទី១៨ ខែធ្នូ ឆ្នាំ ២០២៤។
ថ្លែងនៅឯព្រឹត្តិការណ៍សាលាយោធាមួយ លោកប្រធានាធិបតី Milei បាននិយាយថា កងកម្លាំងសន្តិសុខវ៉េណេស៊ុយអេឡា ក្រោមការបញ្ជារបស់ជនផ្តាច់ការ Nicolas Maduro បានចាប់ខ្លួន លោក Nahuel Gallo ដែលជាទាហានម្នាក់ នៃកងកម្លាំងការពារជាតិអាហ្សង់ទីន។ វាគ្រាន់តែជាបទឧក្រិដ្ឋដែល Gallo បានប្រព្រឹត្តនៅវ៉េណេស៊ុយអេឡា ដើម្បីទៅលេងប្រពន្ធ និងកូនប្រុសរបស់គាត់។
លោក Milei បញ្ជាក់ថា យើងទាមទារឱ្យមានការដោះលែងគាត់ (Gallo) ជាបន្ទាន់ ហើយយើងនឹងប្រេី មធ្យោបាយការទូតទាំងអស់ ដើម្បីបញ្ជូនគាត់ត្រឡប់មកអាហ្សង់ទីនវិញដោយសុវត្ថិភាព។ កាលពីថ្ងៃអង្គារសប្តាហ៍នេះ អ្នកការទូតកំពូលរបស់វ៉េណាស៊ុយអេឡា បានច្រានចោលការអត្ថាធិប្បាយរបស់លោក Milei ដោយនិយាយថារូបលោកផ្ទាល់ និងរដ្ឋមន្ត្រីសន្តិសុខរបស់លោក បានចូលរួមក្នុងផែនការភេរវកម្ម។
គួរបញ្ជាក់ថា លោក Gallo ត្រូវបានចាប់ខ្លួនកាលពីថ្ងៃទី៨ខែធ្នូ បន្ទាប់ពីលោកចូលទៅក្នុងរដ្ឋ Tachira ភាគខាងលិចវវ៉េណេស៊ុយអេឡា តាមប្រទេសជិតខាងគឺកូឡុំប៊ី។ នេះជាភាពតានតឹងថ្មីទៀត រវាងប្រជាជាតិអាមេរិកខាងត្បូងទាំងពីរដោយ បេីទោះបីជាមិនបានកាត់ផ្តាច់ទំនាក់ទំនងការទូតផ្លូវការក្តី ក៏អ្នកការទូតអាហ្សង់ទីន ត្រូវបានបណ្តេញចេញពទីក្រុងការ៉ាកាស កាលពីខែសីហា ឆ្នាំមុន បន្ទាប់ពីការបោះឆ្នោតប្រធានាធិបតីវ៉េណេស៊ុយអេឡា ដែលរដ្ឋាភិបាលលោក Milei ចាត់ទុកថាមានជាការក្លែងបន្លំ៕
